Студиите покажуваат дека постои намален пренос на вирусот по вакцинацијата, но нема доволно докази што укажуваат дека тоа е доволно
Луѓето што биле вакцинирани претпоставуваат дека можат целосно да ги тргнат заштитните маски. Нивната логика е дека не можат да се заразат со ковид-19 или да го пренесат вирусот ако веќе ја примиле вакцината. Погрешно, пишува „Хафингтон пост“.
„Вакцината не ги спречува сите инфекции и сѐ уште можете да го пренесете вирусот, дури и по вакцинирањето со која било од сегашните вакцини. Исто така, сè уште може да се разболите“,
вели Пол Хантер, професор по медицина на Универзитетот на Источна Англија.
Тој и другите научници ги повикуваат луѓето да продолжат да носат маски откако биле вакцинирани со првата и втората доза на вакцината против ковид-19.
Сè уште не знаеме колку вакцините ја запираат инфекцијата, а со тоа и го спречуваат пренесувањето на вирусот. Студиите покажуваат дека постои намален пренос на вирусот по вакцинацијата, но нема доволно докази што укажуваат дека тоа е доволно да спречи да го пренесете вирусот доколку веќе го имате. После вакцинацијата, сѐ уште постои можност да се заразите со вирусот, да не развиете симптоми, но да го пренесете на некој што не е вакциниран – кој би можел многу да се разболи, наведува „Хафингтон пост“.
Маските за лице се главен фактор во спречувањето на заразените лица да го шират вирусот, вели Лоренс Јанг, професор по молекуларна онкологија на Медицинскиот факултет „Варвик“.
„Носењето маска за лице откако сте биле вакцинирани е сè уште важно. Маските можат да спречат да се заразите. Тие можат да дејствуваат како бариера против воздушните капки, а исто така да го одржат вашиот нос топол и влажен, што исто така ја спречува инфекцијата“,
додава тој.
Исто така, е важно да запомните дека е потребно време за вакцината да ве заштити – уште една причина зошто носењето маска е клучно.
„Нивото на заштита се гради најмалку четири или пет недели по првата доза и најмалку уште една недела по ревакцинацијата. Значи, дотогаш не сте толку заштитени како што на крајот ќе бидете“,
вели д-р Питер Инглиш, пензиониран консултант за контрола на заразни болести.