Оттаму посочуваат дека според информациите во британските медиуми и од изјавите на тамошни политичари, може да се заклучи дека Обединетото Кралство планира во иднина и безбедносни аранжмани, вклучително и за мигрантски кампови на Балканот
Во интервју за британската телевизија Скај, премиерот Христијан Мицкоски избегнува да одговори дали со британскиот премиер Кир Стармер ќе разговара за примање мигранти во земјава, како дел од договорот за стратешко партнерство. За ова сомнително однесување на премиерот, како што оценуваат од Социјалдемократскиот сојуз (СДСМ), од Владата сè уште молчат, иако додаваат дека на истата тема им упатиле прашање пред неколку дена.
Од СДСМ велат дека за краткото интервју на Мицкоски дадено за британската телевизија, Владата не ги информирала медиумите, нешто што според нив ги зголемува сомнежите и затоа бараат одговори на неколку прашања.
„Дали кредитот од шест милијарди евра се навистина само за инфраструктура, или се цена за нешто повеќе – за нешто што засега се крие од јавноста? Согласно информациите од британските медиуми, но и од изјавите на британските официјални претставници, договорот во делот на мигацијата подразбира ‘широка соработка‘“,
прашува опозицијата.
Оттаму посочуваат дека според информациите во британските медиуми и од изјавите на тамошни политичари, може да се заклучи дека Обединетото Кралство планира во иднина и безбедносни аранжмани, вклучително и за мигрантски кампови на Балканот.
Опозициската партија вели дека прашањата за кои од Владата три дена нема одговор, гласат:
„Дали сте подготвени во иднина да прифатите Македонија да стане зона за сместување мигранти? Дали договорот каков што е остава простор дека за ова може да се разговара во иднина? Дали можете експлицитно и јасно да потврдите дека ниту сега ниту во иднина Македонија нема да разговара за ваков политички ангажман?“
Посочуваат дека граѓаните имаат право да знаат, дали има некакво ветување, дали има некакви разговори на оваа тема и што точно се разговара.
„Ако Владата нема што да крие, нека одговори. Отворено, јавно и транспарентно“,
велат од СДСМ.
Според нив, Владата потпиша договор вреден 6 милијарди евра, а јавноста засега доби само фотографии и флоскули за „историски моменти“ и „големи инвестиции“, но воопшто не се знае ништо за заднината на овој договор.
Вицепремиерот и министер за транспорт Александар Николоски вчера соопшти дека Владата на седница го прифати договорот помеѓу Владата на Република Македонија и владата на Обединетото Кралство во врска со партнерство за реализација на инфраструктурни проекти.
Додаде дека е овластен да го потпише договорот на церемонија во Лондон закажана за четврток.