Од партијата велат дека се наметнува и прашањето дали власта на Мицкоски единствено спроведуваше инспекциски надзор на универзитетот за да изврши притисок врз структурите на Рамиз Мерко за поддршка на нивниот кандидат – Менди Ќура, кој во трката влезе како независен кандидат, поддржан од владејачките ВЛЕН и ВМРО-ДПМНЕ
Неколку месеци алармираме за сериозни незаконитости на струшкиот универзитет, поврзуван со актуелниот градоначалник на Струга во заминување, Рамиз Мерко, а надлежните институции и премиерот Христијан Мицкоски продолжуваат да молчат. Ова е денешната реакција на партијата Левица, од каде посочуваат дека на овој универзитет е отворена и приватна градинка, за која постојат сомнежи дека ги нема потребните документи за работа.
„Надзор на работата над оваа приватна градинка е должно да изврши Министерството за образование и Министерството за труд и социјална политика. Нејасно е како на овој универзитет се отвора приватна градинка, додека министерката Весна Јаневска пред само неколку месеци изјавуваше дека се констатирани неправилности при инспекциски надзор?“,
прашуваат од партијата.
Оттаму велат дека јавноста никогаш не доби информација од министерката за какви неправилности станува збор, што го наметнува прашањето дали власта на Мицкоски единствено спроведуваше инспекциски надзор на универзитетот за да изврши притисок врз структурите на Рамиз Мерко за поддршка на нивниот кандидат – Менди Ќура, кој во трката влезе како независен кандидат, поддржан од владејачките ВЛЕН и ВМРО-ДПМНЕ.
„Овој т.н. универзитет е во формална сопственост на Армен Кадриу, близок соработник на Рамиз Мерко во неговите криминални мандати. Молкот за оваа приватна градинка и од министерот Фатмир Лимани од ВЛЕН го покажува лицемерието на оние што шират празни флоскули дека се борат против криминалот на ДУИ“,
велат од Левица.
Посочуваат дека министерот Лимани е најповикан да постапи за контроверзното работење на приватната градинка, доколку ВЛЕН им реална политичка волја да го расчисти криминалот и корупцијата.
„Додека Мицкоски само формално демантира дека постои коалиција со Мерко, за време на власта на ДПМНЕ, тој доби две пресуди само со условна казна“,
се вели во партиското соопштение.
Според Левица, дека постои неформална коалиција во Струга меѓу Рамиз Мерко и структурите на власта на Мицкоски, најдобро може да се заклучи од молкот и непостапувањето на институциите за криминалите на овој т.н. универзитет, што го деградира целокупниот образовен систем.
Лидерот на ВМРО-ДПМНЕ и премиер, Христијан Мицкоски вчера рече дека се апсолутно неточни шпекулациите што деновиве се појавија во јавноста за наводни разговори меѓу актуелниот градоначалник на Струга во заминување, Рамиз Мерко, со ВМРО-ДПМНЕ и ВЛЕН за вториот круг од локалните избори.
Според нехо, шпекулациите доаѓаат од портали кои се финансирани од еден ист центар, кој е разочаран од одлуката на Мерко да не ги поддржи ДУИ во вториот круг од локалните избори в недела.
Сè уште актуелниот градоначалник на Струга, Рамиз Мерко, викендов преку објавата на Фејсбук им се обрати на, како што наведе во неа, вистинските и лојални поддржувачи, демантирајќи ги гласините дека во вториот круг ќе го поддржи кандидатот на НАИ.
Трката за градоначалничката функција во Струга, во вториот круг ќе ја трчаат независниот кандидат поддржан од ВМРО-ДПМНЕ и ВЛЕН, Менди Ќура, и Арсим Далипи од „Националната алијанса за интеграција“ предводена од ДУИ.
Ако се цени по првиот круг, битката меѓу двајцата кандидати е многу тесна. Имено, на 19 октомври Менди Ќура освои 9 934 гласа, додека Арсим Далипи имаше 9 719 гласа.
Актуелниот струшки градоначалник, кој во неколку мандати ја водеше општината како кадар на ДУИ, на 9 јуни 2023 година се најде на „црната листа“ на САД поради сериозна корупција и мешање во судски процеси.
