Здружението на новинари на Македонија оценува дека попладневна конференција на претседателот на ДИК, Александар Даштевски, била непрофесионална и дека тој покажал омаловажувачки однос кон дел од новинарите.
Оттаму сметаат дека е за осуда однесувањето на Даштевски, кој наместо конкретно да одговори на новинарско прашање во врска со најавите за продолжување на рокот за гласање и на изборниот молк, тој почнал вербална расправа со новинарката која го поставила прашањето.
„Даштевски пропушти да даде конкретен одговор и истовремено се интересираше колешката од која телевизија е, по што ѝ се обрати со зборовите: треба да се информирате добро пред да поставите некое прашање, како и тоа дека новинарката треба да го чита законот пред да прашува. Го потсетуваме претседателот на ДИК дека според Изборниот законик, член 31, ДИК има обврска да ја информира и да ја едуцира јавноста за начинот на гласање и за остварување на избирачкото право. Од друга страна, новинарот има право да изрази мислење и да постави прашање без разлика од кој медиум доаѓа и дали истото прашање му се допаѓа на претседателот на ДИК или не“,
пишува во писмената реакција од ЗНМ.
Од новинарската организација укажуваат дека новинарите и медиумите играат клучна улога во процесот на изборите, не само вршејќи увид во работата на надлежните институции туку и овозможувајќи им на граѓаните да ги добијат сите потребни информации.
Во однос на поплаките кои во текот на денот стасале до ЗНМ од онлајн медиуми за попречување на нивната работа од страна на симпатизери на политички партии, како и за несоодветен однос на припадници на МВР, од Здружението на новинари на Македонија бараат органите за прогон да не ги игнорираат овие случки и итно да бидат расчистени.