Протестот е организиран непосредно по објавувањето на пресудата за случајот „Феронвест против ИРЛ“ кој се однесува на тужбата за навреда и клевета против Истражувачката репортерска лабораторија (ИРЛ) и главната и одговорна уредничка Сашка Цветковска, поднесена од поранешниот вицепремиер Кочо Анѓушев
„Правото на граѓаните пред интересот на моќниците“ е мотото под кое утре во 11 часот пред Граѓанскиот суд Скопје ќе се одржи новинарски протест во организација на Здружението на новинари на Македонија (ЗНМ) и Самостојниот синдикат на новинари и медиумски работници (ССНМ).
Протестот е организиран непосредно по објавувањето на пресудата за случајот „Феронвест против ИРЛ“ кој се однесува на тужбата за навреда и клевета против Истражувачката репортерска лабораторија (ИРЛ) и главната и одговорна уредничка Сашка Цветковска, поднесена од поранешниот вицепремиер Кочо Анѓушев.
Во пресудата се спори статусот на новинарите во ИРЛ и се тврди дека ИРЛ не е медиум, односно не е здружение за „новинарски известувања“, дека нема ниту својство на медиум, како средство за јавно информирање според Законот за медиуми, a неговите членови немаат својство на новинари, ниту можат, заради известување на јавноста, да прават новинарски обликувани емисии, да се претставуваат како новинари или да се занимаваат со жанрот истражувачко новинарство и сето тоа да го објавуваат преку средствата за јавно информирање.
Според пресудата, ИРЛ и Цветковска се одговорни за клевета со изнесување невистинити факти во првата епизода од истражувањето „Заговор против воздухот“ емитувана на 16 мај 2021 година на МРТ.
„Време е гласно да кажеме дека правото на граѓаните е пред правото на моќниците – судот нема право да одредува кој смее, а кон не смее да работи како новинар“,
пишува ЗНМ во најавата за утрешниот протест.
Новинарите на ИРЛ вчера беа примени во Амбасадата на САД во земјава и остварија средба со амбасадорката Анџела Агелер, која, како што објави на социјалните мрежи, им оддала признание за истражувачките стории.