Во реакцијата на една од владејачките партии се вели оти немаат намера да одговараат на вештачки креирани теми за прифаќање на мигранти оти сите релевантни институции веќе ги демантираа овие наводи
Во Македонија нема простор за прифаќање на мигранти, а движењето ЗНАМ, нема намера да одговара на вештачки креирани теми за прифаќање мигранит од Велика Британија, кои за основна цел имаат создавање на паника помеѓу граѓаните на Македонија, се вели во реакцијата на ЗНАМ по наводите на СДСМ дека тие и ВМРО-ДПМНЕ креираат меѓусебни судири за да побегнат од оваа тема.
Од ЗНАМ велат и оти официјален демант за оваа тема пристигнале од сите релевантни институции во државата и од премиерот.
„СДСМ во тотална немоќ, обезглавена без раководство, само со еден функционер во смисла на Султан партија, раководена од центарот во Струмица и менторот Зоран Заев, бара начини и теми како да биде минимум присутна во јавноста со надеж да го задржи и она малку членство и поддржувачи што остана од неа“,
се вели во реакцијата.
Дополнително, велат оти стравот кај поранешните државни функционери и претенденти за нови функции во СДСМ од поднесените кривични пријави за сторена злоупотреба на службената положба е голем, па затоа, тие сакаат по секоја цена да отворат безсмилени теми и апокалиптични сценарија за колапс на државата и финансискиот систем, за немање пари за исплата на пензии, плати, социјална помош, поврат на ДДВ и слично.
„Само криминогени умови кои размислуваат за својот политички спас може да генерираат вакви политики. Резултатот на овие политики на Венко Филипче е секојдневниот одлив на партиското членство на СДСМ и нивните поддржувачи“,
велат оттаму.