Од партијата на Максим Димитриевски посочуваат дека целата организација на посочената хуманитарна акција била на родителите во соработка со естрадни уметници, водители, диџеи и аниматори кои, како што велат, се изразуваат на слободен стил. Во однос на песната што ја пееја децата, која стана популарна за време на изборната кампања за локалните избори, од ЗНАМ посочуваат дека се работи за авторска, а не за изборна песна
Движењето За наша Македонија ги отфрли како лажни и злонамерни обвинувањата на опозицискиот СДСМ дека деца од Основното училиште „Кочо Рацин“ во Куманово биле злоупотребени и принудени да пеат песна од изборната кампања на актуелниот градоначалник Максим Димитриевски. Велат дека станува збор за хуманитарен настан и дека нема никаква принуда, злоупотреба на децата ниту, пак, каков било организиран партиски ангажман.
„Очигледно е дека во целосно отсуство на сопствени политики, идеи и програма, СДСМ повторно се занимава со измислени скандали. Наместо да поздрават настани од ваков хуманитарен карактер, тие напаѓаат и политизираат, што претставува дното на нивното политичко дејствување. Движењето ЗНАМ категорично ги отфрла сите инсинуации. Немало и нема никаква злоупотреба на деца. Овие конструкции на СДСМ се очаен обид за политичка дискредитација и дефокус од нивната неспособност да понудат било каква визија“,
велат од ЗНАМ.
Партијата која е дел од владејачкото мнозинство посочува дека целата организација на посочената хуманитарна акција била на родителите во соработка со естрадни уметници, водители, диџеи и аниматори кои, како што велат, се изразуваат на слободен стил. Во однос на песната што ја пееја децата, која стана популарна за време на изборната кампања за локалните избори, од ЗНАМ посочуваат дека се работи за авторска, а не за изборна песна.
„СДСМ, партија која со години ја злоупотребуваше секоја институција и секој јавен настан за свои партиски цели, денес држи лекции за наводни злоупотреби.Тоа е врв на лицемерство“,
коментираат од партијата на Максим Димитриевски.
Реакцијата на ЗНАМ следува откако претходно денеска опозицискиот СДСМ обвини дека ученици од Основното училиште „Кочо Рацин“ во Куманово биле злоупотребени за политички цели бидејќи, според партијата, биле принудени да ја пеат песната од изборната кампања на кумановскиот градоначалник Максим Димитриевски.