ЗНАМ алудира на изјавата што Милошоски ја даде вчеравечер во емисијата „Само интервју“ на Канал 5. Рече дека доколку тој би бил премиер, актуелниот министер за правда повеќе не би бил на оваа позиција. Тој ова го кажа велејќи дека забележал пониски перформанси на министерот за правда Игор Филков од она што државата се обврзала да го направи во поглед на носењето на законите од Реформската агенда во делот на правосудството
Движењето За наша Македонија, кое е дел од владејачката коалиција, побара ВМРО-ДПМНЕ во најкраток рок јавно да се огради од ставот на пратеникот од ВМРО-ДПМНЕ и потпретседател на Собранието, Антонио Милошоски, кој изрази сомнеж за квалитетот на работењето на министерот за правда Игор Филков од ЗНАМ.
ЗНАМ алудира на изјавата што Милошоски ја даде вчеравечер во емисијата „Само интервју“ на Канал 5. Рече дека доколку тој би бил премиер, актуелниот министер за правда повеќе не би бил на оваа позиција. Тој ова го кажа велејќи дека забележал пониски перформанси на министерот за правда Игор Филков од она што државата се обврзала да го направи во поглед на носењето на законите од Реформската агенда во делот на правосудството.
„Сметам дека има одредено потфрлање, но времето ќе покаже. Моето мислење сум го споделил и со другите членови на ИК на ВМРО-ДПМНЕ и со претседателот на партијата и стојам зад тоа. Но, како ќе биде понатаму одлучено по однос на реконструкција на Владата, премиерот го има тоа право и ќе си процени во следните месеци. Доколку јас би бил мандатар, актуелниот министер за правда не би бил министер за правда повеќе“,
изјави синоќа Милошоски во емисијата „Само интервју“.
Од движењето За наша Македонија денеска оценија дека Антонио Милошоски е последниот кој има кредибилитет да држи лекции за правосудни стандарди.
„Го слушнавме како објаснува што би направил и што би реконструирал кога би бил премиер. Добро е да потсетиме дека за среќа на сите тој не е премиер, ниту бил ниту ќе биде“,
рече на денешната прес-конференција потпретседателот на ЗНАМ, Павле Арсоски.
Арсоски застана во одбрана на министерот од редовите на ЗНАМ велејќи дека во изминатите 18 месеци откако е на министерската функција, Игор Филков подготвил 28 закони кои се во различна фаза на донесување, а оти најголемо внимание е посветено на законите кои треба да се донесат согласно Реформската агенда.
„Од нив повеќето закони се доставени до Владата и се во владина процедура“,
додаде тој.
Одговарајќи на новинарско прашање дали податокот што речиси 90 проценти од законите се во владина процедура значи дека Владата се однесува неажурно кон подготвените предлози и дали смета дека целиот процес треба да оди позабрзано од страна на Владата, потпретседателот на ЗНАМ рече:
„Перцепцијата во јавноста кон министерот за правда и Министерството за правда коешто во 18 месеци подготви 28 закони, што се нема случено во поновата историја на Македонија, е нешто што треба да се респектира. Законите се подготвени. Некои се во измени и дополнување, некои се комплетно нови закони. Но прашањето треба да го упатите кон Владата и премиерот Мицкоски, а не кон Движењето ЗНАМ, затоа што министерот со неговиот тим ја сработи работата и оваа цела плејада на закони се во одредена фаза на постапка.“
Инаку, ова не е првпат Антонио Милошоски јавно да ја критикува работата на министерот за правда Игор Филков. Уште во април годинава тој оцени дека министерот за правда покажал слаби перформанси по однос на обврските што ги има преземено за реформите во правосудството.
Филков веднаш реагираше на изјавата оценувајќи дека Милошоски е изолиран од матичната ВМРО-ДПМНЕ, а со тоа и неинформиран за носењето на законите.
Премиерот Христијан Мицкоски тогаш се обиде да ја смири ситуацијата уверувајќи дека коалицијата е стабилна, а дека Милошоски и Филков имале лош ден. Лидерот на ЗНАМ, Максим Димитриевски, пак, рече дека изјавите на министерот за правда и пратеникот од ВМРО-ДПМНЕ се некоректни, но оцени дека се работи за лични, а не за официјални ставови на партиите.