Овие податоци вклучуваат општа здравствена состојба, медицински извештаи, алергии и нетолеранции, тековна терапија, дијагностички резултати, имунолошки статус и друго. Сите овие информации ќе бидат прикажани како еден вид „пасош за здравствените податоци“
„Жолто копче“ е најновиот европски стандард во дигиталното здравство, а кој е усвоен и во нашата земја, соопшти денеска Министерството за здравство.
На неодамнешниот меѓународен настан во Виена, националниот здравствен информатички систем „МојТермин“ успешно ги поминал сите технички тестови, добивајќи ја највисоката ознака за интероперабилност. Оваа ознака, додаваат од Здравство, го потврдува системот како технички усогласен со европските стандарди.
Преку новиот стандард „Жолто копче“, граѓаните ќе можат лесно, безбедно и транспарентно да пристапуваат до своите здравствени податоци. Овие податоци вклучуваат општа здравствена состојба, медицински извештаи, алергии и нетолеранции, тековна терапија, дијагностички резултати, имунолошки статус и друго. Сите овие информации ќе бидат прикажани како еден вид „пасош за здравствените податоци“.
„Овој документ е универзално разбирлив и технички усогласен, собирајќи ги најважните здравствени информации за пациентот“,
велат од Министерството за здравство.
Со ова, додаваат од Здравство, Северна Македонија уште еднаш се етаблира како земја пионер во имплементацијата на европските здравствени дигитални стандарди, и тоа четири години пред нивната задолжителна примена во ЕУ во 2029 година.
Според планираните активности на Министерството за здравство, новата функционалност ќе биде достапна за граѓаните преку „МојТермин“ до крајот на оваа година.
Ова, велат оттаму, директно ќе придонесе за побезбедно управување со лични податоци, подобра здравствена грижа и полесна размена на здравствени информации, како во земјата, така и во странство.