Наспроти реакциите на жителите, утринава од Центарот за управување со кризи (ЦУК) во редовниот утрински извештај за состојбата со пожарите до 7 часот се вели дека пожарот на депонијата Вардариште е изгаснат
Жителите на Аеродром и Ново Лисиче, преку Фејсбук, се организираат и денеска да го продолжат протестот што изминатите три дена се одржуваше на крстосницата меѓу булеварите АСНОМ и „Србија“, кај паркот „Авионче“ во Аеродром
Утринава жителите на Аеродром и Ново Лисиче повторно реагираат дека се шири неподнослива миризба на запалена гума, пластика и ѓубре. Според реакциите на социјалните мрежи, миризбата повторно доаѓа од Вардариште, депонијата што веќе неколку дена гори.
Исто така, во коментарите се вели дека разгорувањето било пријавено, а одговорот што го добиле бил дека пожарникарите не можат да го изгаснат.
Во реакциите од жителите се додава дека на депонијата нема присуство на екипи што би ја контролирале ситуацијата и навремено да интервенираат.
Наспроти реакциите на жителите, утринава од Центарот за управување со кризи (ЦУК) во редовниот утрински извештај за состојбата со пожарите до 7 часот се вели дека пожарот на депонијата Вардариште е изгаснат.
Од Дирекцијата за заштите и спасување (ДЗС) велат дека чекаат одговор од скопската Бригада за противпожарна заштита.
Во меѓувреме, жителите на Аеродром и Ново Лисиче, преку Фејсбук, се организираат и денеска да го продолжат протестот што изминатите три дена се одржуваше на крстосницата меѓу булеварите АСНОМ и „Србија“, кај паркот „Авионче“ во Аеродром.
Протестите според најавите на жителите ќе продолжат и денес од 18 часот и ќе траат сѐ додека не се најде трајно решение за Вардариште.
Незадоволството од смрдеата што со години се шири од Вардариште решија да го изразат откако во неделата по трет пат се случи една третина од Скопје да нема струја поради пожар на депонијата.
Организаторите на протестите преку нивната група на Фејсбук велат дека се залагаат загадувањето на воздухот да стане приоритет на сите надлежни институции и за спроведување конкретни мерки кои ќе се справат со сите сценарија што доведуваат до аерозагадувањето и кои ќе ги заштитат граѓаните од него.
Во средата од Основното јавно обвинителство Скопје рекоа дека три лица се осомничени за кривично дело загрозување на животната средина и природата со отпад. Осомничените, како што велат од Обвинителството и од Министерството за внатрешни работи, создале дива депонија на улицата „Зендел Џемаил“ каде што вршеле дејност на откуп на старо железо, метални производи, стари акумулатори и други обоени метали на импровизирани пунктови, без да имаат регистрирано правно лице и без соодветна дозвола за управување со отпад.
Инаку, Вардариште изминатите денови е тема и на кандидатите за градоначалници на Скопје кои доаѓаат од ВМРО-ДПМНЕ, СДСМ и „Независни заедно“.
Кандидатот од ВМРО-ДПМНЕ и актуелен градоначалник на Општина Кисела Вода, Орце Ѓорѓиевски, најави дека уште од октомври ќе започне со темелен процес за правилен третман на отпадот, целосно чистење и уредување на просторот и оти на Вардариште ќе никне еден од најголемите паркови во Скопје.
На ова неговата противкандидатка од СДСМ, Каја Шукова, го обвини за манипулација и некомпетентност поради неговото ветување да изгради парк на локацијата Вардариште.
Според Шукова, ветувањето е целосно неосновано бидејќи „Вардариште“ е најзагадената точка во градот, со над два милиони кубни метри отпад. Таа истакна дека процесот на санација и деконтаминација на земјиштето би траел со години, што го прави невозможно да се зборува за изградба на парк во скоро време.
Вчера, пак, кандидатот за градоначалник на Скопје од „Независни заедно“, Горан Марковски, рече дека ќе изумреме како диносаурусите ако не се справиме со загадувањето. Тој заедно со носителката на кандидатската листа за советници во Град Скопје на граѓанската платформа „Независни заедно“, Јана Белчева-Андреевска, понудија решенија за Вардариште коишто ќе им овозможат на скопјани да дишат нормално, особено на оние сограѓани кои живеат во околината на депонијата.