Споделувајќи фотографии од апликациите за мерење на загаденоста на воздухот, велат дека параметрите на штетни честички во воздухот во овие населби се високи
Жители на скопските населби Аеродром, Ново Лисиче, Кисела Вода, Пинтија и Драчево вечерва се жалат дека во воздухот мириса на чад и на изгорена пластика.
„Во Аеродром и Ново Лисиче не се дише. Ова е за евакуација. Смрди на пластика. Ова е гасна комора“,
се дел од реакциите што тие ги пишуваат на социјалните мрежи.
Споделувајќи фотографии од апликациите за мерење на загаденоста на воздухот, велат дека параметрите на штетни честички во воздухот во овие населби се високи.
Веќе две недели жителите на Аеродром и Ново Лисиче излегуваат на протест на крстосницата на булеварите „Србија“ и АСНОМ пред мостот „Киро Глигоров“ кај паркот „Авионче“ во Аеродром, на кој бараат решавање на проблемот со депонијата во Вардариште.
Од Граѓанската иницијатива „Стоп за Вардариште“, велат дека овој проблем не е нов, но последните месеци достигнува алармантно ниво.
Од надлежните институции бараат решавање на континуираниот проблем со палењето на депонијата во Вардариште, што резултира со секојдневно загадување на воздухот, почвата и водата во Скопје и околината.
Премиерот Христијан Мицкоски денеска, коментирајќи го квалитетот на воздухот во главниот град откако вчера попладне избувна пожар во депонијата „Дрисла“, рече дека иако визуелно изгледа дека воздухот во Скопје е загаден, сепак, испитуваните параметри на штетни честички не се така алармантни.
„Нема зголемени такви параметри што се алармантни. Тоа е визуелно така, но кога се испитувани параметрите не се така алармантни. Но, лошо е да се прави тоа. И ќе се прави и има причина зошто се прави. Затоа го поставив прашањето кому му одговара ова да се случува сега. Кога ќе дадете одговор на ова прашање, ќе ви стане јасно кој и зошто го прави“,
рече тој.
Инаку, пожарот на депонијата „Дрисла“ што избувна вчера во 15:15 часот сè уште е активен. Наместо со вода, се гаси со затрупување на најкритичните делови. Оваа мерка е донесена откако претходните обиди за гаснење со вода не дале резултати.