Вчера во Тетово е приведен 42-годишниот А.Р. за кого полицијата се сомнева дека ги оштетил двете цевки, и со тоа ги доведе во опасност животите на пациентите кои биле сместени во болницата и им била неопходна кислородна поддршка
Четириесет и двегодишен жител на селото Желино вчера бил приведен, бидејќи полицијата се сомнева дека тој е вмешан во оштетувањето на системот за централен довод на кислород во тетовската болница што се случи на 23 август. Тогаш насилно беа оштетени две бакарни цевки, од кои едната за компримиран воздух била скината, а втората за азотен оксидол била свиткана.
„Полициски службеници на Секторот за внатрешни работи Тетово вчера околу 17 часот во Тетово го лишиле од слобода А.Р. (42) од тетовско Желино поради сомнение за негова инволвираност во оштетувањето на двете бакарни цевки во кругот на тетовската Клиничка болница, пријавено на 23 овој месец. Се преземаат мерки за расчистување и документирање на случајот“,
информира Марјан Јосифоски, портпарол на СВР Тетово.
Од СВР Тетово велат дека по барање на болницата по инцидентот е зголемено присуство на полицајци околу објектите.
Како што изјавија тогаш од тетовската болница, во моментот во ковид-одделението имало 125 пациенти на кои им била потребна кислородна поддршка.
„Изгледа имавме среќа, сите 125 пациенти што ги имавме ги спасивме, бидејќи да имаше оштетување на главната цевка тоа ќе беше катастрофа и не би сакал да предвидам што би можело да се случи и што би можеле ние да направиме во тие моменти. Тоа би требало да значи транспорт на сите пациенти од сите одделенија, а имаме нетранспортабилни пациенти. Замислете, би требало над 70 отсто од пациентите да се транспортираат итно, за наша среќа, тоа не се случи. Се надевам дека сега полицијата ќе види за што се работи и кој е авторот на ова дело“,
изјави тогаш д-р Гзим Нуредини, координатор во ковид-центарот на Клиничката болница.