Тој додава дека постапката не се води против Владата, туку против Претседателот на државата, што го прави поседувањето информации од страна на Митева уште поскандалозно
Членот на Извршниот одбор на СДСМ, Андреј Жерновски, најави дека поднесува претставка до Судскиот совет по изјавите на владината портпаролка Марија Митева, во кои таа јавно соопшти исход од судска постапка која сè уште е во тек пред Вишиот управен суд.
Според Жерновски, признанието на Митева дека „жалбата против претседателката е одбиена како неоснована“ е крајно сериозно и скандалозно, со оглед на тоа што второстепена одлука официјално сè уште не е донесена.
„Како портпарол на Владата располага со информации за тековен судски процес во кој не се јавува како странка во постапка? Како истата располага со информации дека воопшто е донесена првостепена одлука, дека има жалба и дека истата е неоснована, во услови кога воопшто не е донесена второстепена одлука? Ова не се гласини кои кружат во јавноста, ова може да биде единствено информација добиена директно од самиот суд“,
тврди Жерновски во објава на неговиот фејсбук-профил.
Тој додава дека постапката не се води против Владата, туку против Претседателот на државата, што го прави поседувањето информации од страна на Митева уште поскандалозно.
Жерновски смета дека ова е директна потврда за влијанието на извршната власт врз судската, што е спротивно на принципите за поделба на власта.
Тој е најавува дека ќе инсистира на политичка и судска одговорност за овој случај.
„Поради сериозноста на ситуацијата, поднесувам претставка. Политичка и судска одговорност за овој скандал мора да има. И ќе има“,
дециден е тој.
Жерновски вчера на прес-конференција обвини дека судската власт во нашата држава е директно под контрола на извршната власт. Според Жерновски, настапот на владината портпаролка Марија Митева на телевизиска дебата претставува „скандалозно признание“ дека Владата располага со информации за судски пресуди пред тие да им бидат доставени на странките.
Жерновски посочи дека портпаролката на Владата изнела информации за неговиот судски процес против МНР, наведувајќи дека неговата жалба е изгубена.
Митева, пак, смета дека oбидот на членот на Извршниот одбор на СДСМ, Андреј Жерновски, да конструира наратив за „скандал“ претставува класичен пример на политичка дезориентација и дефокус од суштинските прашања.
Наспроти тврдењата на Жерновски дека Владата има увид во тековни процеси, Митева појасни дека станува збор за одлука која е веќе донесена.