Според последните информации, во несреќата се повредени 1 175 луѓе, од кои 793 се пуштени на домашно лекување, а преостанатите остануваат в болница
Индискиот министер за железници Ашвини Ваишнав изјави дека неисправната сигнализација е веројатната причина која доведе до судирот на три воза и огромен број човечки жртви во Одиша. Според Би-би-си, тој кажал и дека луѓето виновни за несреќата се идентификувани, но не дал повеќе детали.
Извештајот за несреќата, која е најголема железничка несреќа во Индија во овој век, сè уште се пишува.
Се „намали“ бројот на мртви
Од денеска официјалниот број на починати во несреќата е 275. Тоа е помалку од претходните извештаи за над 280 мртви. Индиските власти велат разликата е последица на двојно броење на некои тела.
Во трите воза кои се судрија имало околу 2 000 луѓе. Покрај починатите, уште 1 175 се повредени. Од нив, 793 се пуштени на домашно лекување додека преостанатите 382 остануваат в болница.
Како се случила несреќата
Според верзијата на властите, железничката несреќа се случила кога возот „Коромандел експрес“, поради неисправен сигнал, бил насочен на железничка шина на која била паркирана товарна композиција. Кога „Коромандел експрес“ удрил во товарниот воз, голем дел од вагоните излетале од своите во соседните шини.
??
— Mahmood Khan (@Mahmood88239370) June 2, 2023
Passenger and freight train collided in #India, according to the latest data, 179 people were injured, reports local TV. At least 30 people died, according to preliminary data, in the collision of passenger and freight trains in India, according to #HindustanTimes pic.twitter.com/hoDSxdb3DZ
Токму по едни од соседните шини, кои биле блокирани од излетаните вагони, но во спротивна насока, набргу наишол патничкиот „Ховрах експрес“, кој се судрил со вагоните кои биле на неговата патека поради претходната несреќа.
„’Кромандел експрес’ требало да патува по главната линија, но бил даден сигнал за помошната линија. Возот се забил во товарен воз кој веќе бил паркиран таму“,
изјавуваат од индиската компанија „Саутистерн раилвејс“.
Најголемата железничка несреќа е со 800 жртви
Возовите се важно транспортно средство во Индија. Земјата ја има една од најголемите железнички мрежи во целиот свет. Дневно железницата ја користат милиони патници. Возовите, особено во овој период на годината кога почнуваат училишните одмори, често се преполнети.
И покрај големиот број жртви, несреќата кај Одиша не е најголемата железничка несреќа во Индија. Во 1981 година преполнет воз бил оддуван од шините од циклон и паднал в река. Бројот на жртви бил околу 800.