Пред Апелацискиот суд во Скопје денеска треба да продолжи јавната седница за жалбите за пресудата за случајот „27 април“ со која на вкупно 211 години затвор осудени се 16 лица.
Седницата пред второстепениот суд започна вчера со реферирање за пресудата која е напишана на околу 1 000 страници. Сите осудени од првостепениот суд имаат жалби, додека обвинителството има жалба на ослободителната пресуда за Игор Дурловски. Термин за оваа седница, поради обемноста на предметот, е закажан и за утре.
Вчера тројца адвокати побараа судиите Јани Нича, Тања Дуковска и Енвер Беџети да бидат изземени. Причината за ваквото барање тие ја образложија со тоа што овие судии биле дел од совети кои одлучувале за жалбите за притворите, за понудените гаранции и за жалбите за одбиената амнестија на дел од обвинетите во овој предмет, па затоа одбраната беше на став дека судиите имаат веќе оформено мислење за случајот. Нивното барање беше одбиено, по што се продолжи со седницата.
Меѓу осудените во овој предмет е ексдиректорот на БЈБ, Митко Чавков, кој има највисока затворска казна од 18 години. Осудени се и други лица на раководни позиции во МВР во времето на настаните од 27 април 2017 година во Собранието, како и лица кои се сметаа за директни учесници во насилството.
15 обвинети кои беа дел од овој предмет, пак, добија амнестија со Законот кој го донесе Собранието во декември 2018 година.