Според министерката за финансии, проценките се дека мерката за 14.500 денари плата за приватните фирми ќе заштити околу 200 илјади работни места
За мерката 14.500 денари финансиска поддршка по вработен се имаат пријавено околу 24.000 компании и околу 6.000 самостојни вршители на дејност. Во гостување на ТВ 24 министерката за финансии Нина Ангеловска рече дека е задоволна од одѕивот на компаниите, како и дека има податоци дека изминатите неколку дека работодавачите вратиле околу 500 работени на работа за да ја користат мерката.
Ангеловска, како што соопштуваат од Министерството за финансии, вели дека одѕивот на фирмите е голем, а за колку работници станува збор, ќе се види кога компаниите ќе го пополнат МПИН образецот. Во однос на компаниите од погодените индустрии како угостителство и туризам, Ангеловска рече дека најголем број од регистрираните фирми од оваа дејност се пријавени.
„Во угостителство и во туризам во државата се регистрирани 4.400 субјекти. Значи ако ги земете бројките од пријавените од овие сектори, најголем број се пријавиле за користење на мерката. Интересот на компанииите за мерката покажува дека таа била добро дизјанирана, дека компаниите се задоволни, заинтересирани да аплицираат. Ќе видиме точно колку работни места ќе поддржи мерката, кога ќе ги пополнат МПИН образците, но одѕивот ни дава за право да кажеме дека ќе бидат заштитени голем број на работни места, што беше и целта на мерката. Ние очекувавме и калкулиравме дека мерката ќе заштити околу 200.000 работни места“,
вели Ангеловска.
Според директорката на Агенцијата за вработување Билјана Јовановска, бројот на невработените лица, кои согласно законските прописи се евидентираат во Агенцијата за вработување, во март и април бележи зголемување, што е очекувано, со оглед на целокупната состојба во светот предизвикана од пандемијата. Се надевам, вели, дека во најскоро време ќе се стабилизира целокупната состојба и ќе се вратат во нормален тек сите активности, што ќе придонесе до раздвижување на пазарот на трудот и со тоа и намалување на бројот на невработените лица.
„Владата донесе пакет економски мерки со цел да се помогне на стопанството и да се сочуваат колку што може повеќе работните места на граѓаните. Во изминатите три години како резултат на позитивните ефекти од реализацијата на политиките за вработување насочени кон отворање нови работни места, вклучително и активните програми и мерки за вработување што ги реализира Агенцијата за вработување, се забележа континуирано намалување на невработеноста, за што говорат и официјалните податоци од Државниот завод за статистика. Се надевам дека во најскоро време ќе се стабилизира целокупната состојба и ќе се вратат во нормален тек сите активности, што ќе придонесе до раздвижување на пазарот на трудот и со тоа и намалување на бројот на невработените лица“,
истакнува Јовановска во интервју за МИА.