Младите пациенти имаат болки во стомакот, воспаление на срцето, повраќање и дијареја
Британски лекари забележале нагло зголемување на бројот на деца примени на интензивна нега со сериозен „воспалителен синдром“ што може да се поврзе со коронавирус.
Британската национална здравствена служба соопшти дека во последните три недели се забележува очигледно зголемување на бројот на деца и млади кои покажале мултисистемска воспалителна состојба за која е потребна интензивна нега и препорачаа лекарите да ги следат случаите со посебна грижа.
Младите пациенти имаат болки во стомакот, воспаление на срцето и гастроинтестинални симптоми, како повраќање и дијареја.
Лекарите ја споредија таа мистериозна компликација со синдромот на токсичен шок и кавасаки-евата болест, што во комбинација предизвикуваат внатрешно отекување, треска и респираторни проблеми, сите карактеристики за заразени од ковид-19.
Сепак, дел од тие деца со интензивна нега не биле позитивни на коронавирусот, што дополнително ја комплицира дијагнозата и отвори врата за идеја дека може да има друг патоген зад тој синдром. Педијатри од болницата „Сент Мери“ велат дека италијански и шпански лекари исто така пријавиле случаи на болни деца со исти симптоми.