fbpx
Македонија

Земјотрес со јачина од 3,1 степени во Албанија, почувствуван во Дебар и околината

360степени | 28 февруари, 2024 07:47

Земјотресот е почувствуван во југозападниот дел од земјата, и тоа во Дебар и околината, со интензитет од три степени според Европската макросеизмичка скала

Земјотрес со јачина од 3,1 степени според Рихтеровата скала синоќа е регистриран во Албанија во 23:37 часот по локално време, информираат од Сеизмолошката опсерваторија при Природно-математичкиот факултет во Скопје.

Според информациите од Сеизмолошката опсерваторија, епицентарот на земјотресот бил на 128 километри југозападно од Скопје, во соседна Република Албанија.

Земјотресот бил на длабочина од 8 километри.

Во соопштението од Сеизмолошката опсерваторија при Природно-математичкиот факултет се наведува дека земјотресот е почувствуван во југозападниот дел од земјата, и тоа во Дебар и околината, со интензитет од три степени според Европската макросеизмичка скала.

Земјотресот во Албанија е регистриран и од Европскиот медитерански сеизмолошки институт (EMSC).

Според информациите од Европскиот медитерански сеизмолошки институт, епицентарот на земјотресот бил на 22 километри североисточно од Елбасан и на седум километри западно од градот Либражд.

Нема информации за повредени лица или за причинета материјална штета.

©2026 360 степени, Сите права се задржани