Предлог-одлуката за обезбедување на макрофинансиска помош на С Македонија од страна на Европската комисија беше усвоена на 6 февруари годинава. Финансиската помош која земјава треба да ја добие изнесува 100 милиони евра, а таа е наменета пред сè за справување со последиците предизвикани од руската агресија врз Украина
Помошта денеска треба да се најде на дневниот ред на седницата на Комитетот на постојаните претставници на владите на земјите членки во Европската Унија (КОРЕПЕР), а на седницата гласањето за финансиската поддршка би требало да биде само формалност бидејќи претходно, на 13 јуни помошта беше одобрена од Европскиот парламент во прво читање, па сега остана само на КОРЕПЕР да ја одобри.
„Исходот од гласањето во Европскиот парламент го одразува постигнатиот договор меѓу институциите за прифаќање на предлогот на Комисијата и затоа треба да биде одобрен. Затоа, од Комитетот на постојаните претставници се бара да ја потврди својата согласност и да му предложи на Советот да ја одобри позицијата на Европскиот парламент“,
стои во предлог-иницијативата.
На овој начин, се вели во текстот, Европската комисија застанува покрај С Македонија во овие предизвикувачки времиња бидејќи по руската агресија врз Украина надворешниот биланс на земјата се влоши поради нејзината зависност од увоз на гориво и електрична енергија.
Предложената помош ќе придонесе за покривање на финансиските потреби на Северна Македонија во 2023 и 2024 година, поддржувајќи ја и фискалната одржливост и структурните реформи. Покрај овој предлог, за земјава е предвидена и 24-месечна програма за поддршка склучена со Меѓународниот монетарен фонд (ММФ) бо износ од 530 милиони евра. Предвидено е помошта да биде исплатена во форма на заеми во две транши, но нивната исплата ќе зависи од реформите на политиките во повеќе области, како и од спроведувањето на програмата на ММФ.
„Овие реформи ќе ја поддржат Северна Македонија на нејзиниот пат кон членство во ЕУ, се додава во предлогот на Еврокомисијата, при што се посочува дека „Северна Македонија е земја кандидат за членство во ЕУ, која формално ги отвори пристапните преговори со ЕУ во јули 2022 година“,
велат од ММФ.