Потребни ни се 14 бригади за да бидеме подготвени за руската армија, а досега од пакетите со пратки за оружје не успеавме да опремиме ниту четири, вели украинскиот претседател Володимир Зеленски во интервју за Си-ен-ен
Ситуацијата на истокот од Украина е многу тешка оти половина од украинските бригади што се борат во овој предел од земјата не се доволно опремени, вели украинскиот претседател Володимир Зеленски. Тој во интервју за Си-ен-ен вели дека украинската армија трпи големи штети и загуби, меѓу другото, поради доцнењето со испораките на оружјето од Западот кое е наменето за опремување на вооружените сили на Украина.
„Потребни ни се 14 бригади за да бидеме подготвени. Досега од овие пакети не опремивме ниту четири“,
вели Зеленски.
Дополнително, според него, токму доцнењето со доставувањето на борбените возила и артилерија е причина зошто голем број украински војници загинаа во изминатиот период и затоа тој уште еднаш испрати апел до САД и европските земји да ја забрзаат процедурата за испорака.
Украинскиот претседател во текот на месецов треба да оствари средба со претседателот на САД, Џозеф Бајден, на кој се очекува да му претстави план за ставање крај на две и полгодишната војна со Русија. Зеленски најави дека главните компоненти на планот се безбедносна и дипломатска поддршка, но и воена и економска помош. Се очекува тој повторно да побара неговата земја да користи американско оружје со долг дострел иако барем засега тоа изгледа тешко остварливо.
„Единственото нешто од што се плаши рускиот претседател Владимир Путин е реакцијата на неговиот народ ако цената на војната ги натера да страдаат. Направете ја Украина силна и ќе видите дека тој ќе седне и ќе преговара“,
кажа Зеленски.
Инаку, претходно средбата на американскиот претседател Џозеф Бајден и британскиот премиер Кир Стармер во Вашингтон не донесе новости во однос на барањето на украинскиот претседател Володимир Зеленски за користење западно оружје – ракети со долг истрел кои Украина би ги користела за напади врз Русија, јави Би-би-си.
Ова значи дека, барем засега, САД и Обединетото Кралство нема да ѝ дозволат на Украина да користи ракети од нивно производство за напади врз цели и градови во Русија и покрај барањата на Зеленски, кој неколкупати претходно говореше дека тоа е единствениот начин да се стави крај на војната која трае нешто повеќе од две и пол години.