Трамп за Ројтерс изјави дека рускиот претседател Владимир Путин е подготвен да ја заврши својата речиси четиригодишна инвазија на Украина, додека за Зеленски рече дека бил повоздржан
Претседателот на Украина Володимир Зеленски, во вечерното обраќање до нацијата, изјави дека Киев не е и нема да биде пречка за мирот.
Неговата изјава уследи откако американскиот претседател Доналд Трамп вчера наведе дека Украина, а не Русија го забавува евентуалното склучување на мировен договор.
Трамп за Ројтерс изјави дека рускиот претседател Владимир Путин е подготвен да ја заврши својата речиси четиригодишна инвазија на Украина, додека за Зеленски рече дека бил повоздржан.
„Мислам дека е подготвен да склучи договор. Мислам дека Украина е помалку подготвена да склучи договор“,
рече Трамп.
На прашањето зошто преговорите предводени од САД сè уште не го решиле најголемиот копнен конфликт во Европа од Втората светска војна, Трамп одговори: „Зеленски“.
Кремљ се согласи со изјавата на американскиот претседател.
„Можеме да се согласиме со тоа. Тоа е навистина точно“,
изјави портпаролот на рускиот претседател Дмитриј Песков пред новинарите кога го прашаа како ја коментира изјавата на Трамп дека Москва е подготвена да постигне договор и дека Зеленски е виновен за одложувањето на решавањето на конфликтот.
Песков рече дека Путин останува отворен за постигнување решение за војната во Украина и дека ставот на Русија добро им е познат и на Вашингтон и на Киев.
Кремљ се надева, посочи тој, дека посетата на Москва на специјалниот претставник на САД Стив Виткоф, и зетот на американскиот претседател Доналд Трамп Џаред Кушнер, ќе се реализира кога ќе се договорат датумите.