Изјавата на Зеленски доаѓа еден ден откако приватен авион во кој Евгениј Пригожин бил регистриран на списокот на патници, се урна во регионот Твер додека летал од Москва кон Санкт Петерсбург
Украина не е вмешана во наводната смрт на шефот на платеничката група „Вагнер“, Евгениј Пригожин, изјави украинскиот претседател Володимир Зеленски, пренесуваат светските медиуми.
„Ние не сме вмешани во оваа ситуација, тоа е сигурно. Мислам дека на сите им е јасно кој е вклучен“,
рече Зеленски пред новинарите во Киев.
Изјавата на Зеленски доаѓа еден ден откако приватен авион во кој Евгениј Пригожин бил регистриран на списокот на патници, се урна во регионот Твер додека летал од Москва кон Санкт Петерсбург.
Истражни екипи од денеска наутро се на местото кадe што се урна авионот.
Руските власти соопштија дека отвориле две истраги за падот на авионот на чиј список на патници бил и шефот на „Вагнер“.
Руската државна воздухопловна управа „Росавијација“ соопшти дека специјално формирана комисија започнала да ги истражува околностите и причините за уривањето на авионот „Ембраер-135“.
Како што беше претходно соопштено, авионот „Ембраер-135“ (EBM-135BJ Legacy 600) летал од Москва за Санкт Петерсбург со седум патници и тројца членови на екипажот, соопшти руската воздухопловна управа.
Rуската новинска агенција ТАСС соопшти дека во авионот покрај Пригожин биле и Дмитри Уткин, исто така еден од основачите на „Вагнер“, Сергеј Пропустин, Евгениј Макаријан, Александар Тотмин, Валери Чекалов, Николај Матјусеев и тројца членови на екипажот – пилотот на авионот Алексеј Левшин, копилотот Рустам Каримов и стјуардесата Кристина Распопова.
Од „Ембраер“, бразилската компанија која е дизајнер на авионот, соопштиле дека нејзината служба за поддршка на авионот „Легаси 600“ е суспендирана од 2019 година, во согласност со санкциите против Русија.
Во соопштението, од компанијата наведуваат дека се свесни за несреќата што се случи со „Легаси 600“ во Русија, но, оти немаат дополнителни информации за случајот.
„Компанијата се придржуваше и продолжува да се придржува кон меѓународните санкции наметнати на Русија“,
се додава во соопштението, пренесува регионалниот сервис на Радио Слободна Европа (РСЕ).
Во врска со несреќата, министерот за надворешни работи на Полска, Збигњев Рау, изјави дека малку е веројатно дека станува збор за случајност.
„Малку е веројатно дека некој ќе помисли дека ова е случајност. Едноставно се случува политичките противници кои Владимир Путин ги смета за закана за неговата моќ да не умрат природно“,
изјави полскиот министер за надворешни работи Збигњев Рау.
Доколку биде потврдено дека Пригожин загинал во авионската несреќа, тоа би било голем удар за групата „Вагнер“, која беше клучна во битката на Русија за заземање на украинскиот град Бахмут на почетокот на оваа година.
Откако ТАСС објави дека Евгениј Пригожин загинал во авионска несреќа во Русија, каналите на Телеграм поврзани со „Вагнер“ најавија брутална одмазда.
„Отворено кажуваме дека главните осомничени за смртта на Пригожин седат во Кремљ. Државниците на чело со Путин се обиделе да го убијат. Сите се прашуваат што ќе правиме ако се потврди смртта на Пригожин. Само едно ќе ви кажам – подгответе се за нас! Ќе организираме втор марш кон Москва“,
објавено е на каналот Зелена зора.