Информирајќи на социјалните платформи за телефонскиот разговор со американскиот претседател, Зеленски наведува дека станало збор и за можностите за заедничко производство на оружје меѓу САД и Украина
Украинскиот претседател Володимир Зеленски денеска соопшти дека разговарал со претседателот на Соединетите Американски Држави (САД), Доналд Трамп за потребата од зајакнување на воздушната одбрана на Украина во услови на ескалација на руските напади врз уккраинските градови.
Информацијата за телефонскиот разговор, Зеленски ја соопшти во објави на платформите Телеграм и Икс, наведувајќи дека американскиот претседател е многу добро информиран за ситуацијата во Украина.
„Разговаравме за можностите за воздушна одбрана и се договоривме да работиме заедно за да ја зајакнеме заштитата на нашето небо”, напиша Зеленски.
Тој вели дека се согласиле да одржат посебен состанок меѓу нивните тимови за ова прашање, додавајќи дека со Трамп разговарале и за можностите за заедничко производство на оружје.
„Ние сме подготвени за директни проекти со Соединетите Држави и веруваме дека тоа е од клучна важност за безбедноста, особено кога станува збор за беспилотни летала и сродни технологии”,
наведе украинскиот претседател.
Украинскиот претседател во објавата, исто така, го честита Денот на независноста на САД, заблагодарувајќи се за досегашната американска поддршка за Киев во руската агресија врз земјата.
„Направивме многу заедно со Америка и ги поддржуваме сите напори за запирање на убиствата и враќање на нормален, стабилен, достоинствен мир. За мир е потребен пристоен договор, а Украина ги поддржува американските предлози“,
вели Зеленски.
Двајцата лидери, исто така, разговарале за меѓусебни набавки и инвестиции, како и за дипломатската ситуација и заедничката работа со САД и другите партнери.
I had a very important and fruitful conversation with @POTUS. I congratulated President Trump and the entire American people on the US Independence Day.
— Volodymyr Zelenskyy / Володимир Зеленський (@ZelenskyyUa) July 4, 2025
We – in Ukraine – are grateful for all the support provided. It helps us protect lives, safeguard our freedom and… pic.twitter.com/kQ3Byipvd2
Овие најави од Зеленски доаѓаат откако Киев изрази загриженост поради одлуката на САД да запре со испораките на дел од клучните оружја за Украина.
Според „Аксиос“, телефонскиот разговор меѓу Трамп и Зеленски траел околу 40 минути и бил фокусиран на ескалацијата на руските напади и американската поддршка за украинската противвоздушна одбрана.
Телефонскиот разговор меѓу двајцата претседатели доаѓа по оној вчера меѓу Трамп и рускиот претседател Владимир Путин, кој американскиот претседател го оцени како многу разочарувачки
„Не мислам дека е подготвен да го запре ова насилство. Не видов никаков напредок“,
изјави синоќа Трамп пред новинарите.
Неколку часа по тој разговор, Русија ја изведе најголемата офанзива со дронови врз Киев од почетокот на војната, при што загина едно лице, а 23 беа повредени. Шефот на воената администрација на Киев, Тимур Ткаченко, ја опиша ноќта како „една од најстрашните досега“.
„Десетици балистички ракети и дронови паѓаа врз главниот град. Веднаш по разговорот на Путин со Трамп“,
соопшти украинскиот министер за надворешни работи, Андриј Сибиха.
Зеленски ја осуди офанзивата, нарекувајќи ја масивна и цинична, а повтори и дека Русија нема да го промени „своето глупаво и деструктивно однесување“ без засилен притисок од САД и сојузниците.
Инаку, разговорот меѓу Трамп и Зеленски доаѓа во време кога Пентагон привремено ја запре испораката на клучни оружја за Украина, вклучително и ракетите „Патриот“ и прецизно насочувани артилериски гранати. Киев предупреди дека оваа одлука сериозно ја поткопува неговата способност за одбрана од руската агресија.