Русија последните денови ги засили нападите врз енергетската и гасната инфраструктура на Украина, во кампања која по обем потсетува на најлошите зимски напади во изминатите години. За само неколку дена, десетици енергетски објекти низ целата земја беа погодени, оставајќи милиони луѓе без електрична енергија, вода и греење, бидејќи температурите штотуку почнуваат да опаѓаат
Украинскиот претседател Володимир Зеленски денеска објави дека Русија во текот на изминатата ноќ употребила 300 дрона и 37 ракети за напади врз украинската инфраструктура.
„Русите оваа есен го користат секој ден за да ја таргетираат нашата енергетска инфраструктура“,
напиша тој на социјалната мрежа Икс.
Украинската приватна енергетска компанија ДТЕК претходно утринава објави дека по рускиот напад врз енергетската инфраструктура во текот на ноќта, работата на фабриката за производство на гас во регионот Полтава е запрена.
Извори од индустријата изјавија дека руските напади предизвикале значителна штета на гасниот сектор на Украина.
Извршниот директор на украински „Нафтогас“ изјави дека нападите ја запреле работата во неколку објекти од критично значење.
Тој нагласи дека тие имаат директно влијание врз домашното производство на гас и дека Киев ќе мора да ги покрие загубите со увоз.
Русија последните денови ги засили нападите врз енергетската и гасната инфраструктура на Украина, во кампања која по обем потсетува на најлошите зимски напади во изминатите години. За само неколку дена, десетици енергетски објекти низ целата земја беа погодени, оставајќи милиони луѓе без електрична енергија, вода и греење, бидејќи температурите штотуку почнуваат да опаѓаат.
Според проценките на воените и енергетските аналитичари објавени од Ројтерс и Блумберг, Русија ги повторува бруталните тактики што ги користеше во минатите зими – систематски напаѓајќи ги електроенергетските и гасните постројки за да ја намали отпорноста на Украина и да го ослаби моралот на населението.
Целта не е веднаш да се исклучи струјата, туку да се предизвика долгорочно осиромашување преку постојани поправки, преоптоварувања и недостиг на делови.
Нападите се темпирани да се совпаднат со промената на сезоната: како што паѓаат температурите, секоја штета има поголемо влијание, а работата на мрежата се забавува. Аналитичарите предупредуваат дека Москва користи тактика на „одбрана од заситеност“ – користејќи масивни бранови беспилотни летала и ракети за да ги истроши украинските ракети за воздушна одбрана, а потоа прецизно таргетирајќи ги клучните точки на енергетската инфраструктура.