„Руското гранатирање е тоа што спречува поправка на далноводите до централата и враќање на основната безбедност. И ова е закана апсолутно за сите“, вели украинскиот претседател
Украинскиот претседател Володимир Зеленски вели дека нуклеарната централа „Запорожје“ е исклучена од електричната мрежа седум дена по ред. Зеленски вели дека ова никогаш порано не се случило и предупредува дека ситуацијата е критична.
„Поради руското гранатирање, централата е исклучена од струја, исклучена од електричната мрежа и се снабдува со електрична енергија преку дизел-генератори. Генераторите и централата не беа дизајнирани за ова и никогаш не работеле во овој режим толку долго“,
пишува Зеленски во објава на неговиот фејсбук-профил.
Според информациите што ги пренесува Зеленски, еден генератор откажал.
„Руското гранатирање е тоа што спречува поправка на далноводите до централата и враќање на основната безбедност. И ова е закана апсолутно за сите“,
додава тој.
Зеленски вели дека она што Русија го прави сега, ниеден терорист во светот никогаш не се осмелил да го направи на нуклеарна централа.
Украинскиот претседател вели дека одржал состанок со војската и Министерството за енергетика и им наложил заедно со Министерството за надворешни работи целосно да го свртат вниманието на светот кон оваа ситуација.
Рафаел Гроси, шефот на Меѓународната агенција за атомска енергија (МААЕ), надзорниот орган за нуклеарна енергија на ОН, како што пишува „Гардијан“, вели дека се работи со двете страни за обновување на надворешниот далновод.
Гроси рече дека нема непосредна опасност сè додека дизел-генераторите остануваат во функција, обезбедувајќи итна енергија за објектот.
„Иако централата во моментов се справува благодарение на своите дизел-генератори за итни случаи – последната линија на одбрана – и нема непосредна опасност сè додека тие продолжуваат да работат, очигледно не е одржлива ситуација во однос на нуклеарната безбедност“,
рече тој.