Претседателот на Украина смета дека е позитивен знак тоа што неговиот руски хомолог почнал да размислува за изнаоѓање мирна разврска на воениот конфликт. Сепак, тој смета дека е неопходно најпрво да дојде до примирје кое би стартувало од утре, 12 мај
Володимир Зеленски му одговори на Владимир Путин, кој сношти формално го отфрли ултиматумот од лидерите на најмоќните европски земји и предложи директни мировни преговори со Украина на 15 мај во Истанбул на кои „ќе се отстранат корените на конфликтот“ и „ќе се постигне враќање на долгорочен, траен мир“.
„Позитивен знак е што Русите конечно почнаа да ја разгледуваат можноста за завршување на војната. Целиот свет го чекаше ова многу долго време. А првиот вистински чекор кон вистинскиот крај на која било војна е прекин на огнот. Нема смисла да се продолжува со убивањето уште еден ден. Очекуваме Русија да потврди прекин на огнот – целосно, трајно и сигурно – почнувајќи од утре, 12 мај, и Украина е подготвена за состанок“,
пишува во одговорот на Володимир Зеленски на предлогот на Путин објавен на неговиот профил на социјалната платформа Икс.
Инаку, германскиот канцелар Фридрих Мерц, францускиот претседател Емануел Макрон, британскиот премиер Кир Стармер и полскиот премиер Доналд Туск вчера беа во Киев. Оттаму, по заедничкиот телефонски разговор со американскиот претседател Доналд Трамп, му поставија ултиматум на Путин и побараа да се согласи на 30-дневен прекин на огнот што ќе започне во понеделник, 12 мај. Доколку одбие, рекоа тие, западните земји ќе испратат уште повеќе оружје во Украина и ќе воведат нови „масовни“ санкции врз Русија.
Путин формално го одби предлогот најпрво да дојде до примирје, но се согласи да се преговара.
Францускиот претседател Емануел Макрон денеска изјави дека со предлогот, рускиот претседател се обидува да купи време, бидејќи за да се стигне до преговори е неопходно да има безусловен прекин на огнот.
Американскиот претседател Доналд Трамп изрази надеж дека денот на почетокот на преговорите би бил „потенцијално голем ден за Русија и Украина“.
„Помислете на стотиците илјади животи што ќе бидат спасени ако се надеваме дека ова бесконечно ‘крвопролевање’ ќе заврши. Тоа ќе биде сосема нов и многу подобар свет. Ќе продолжам да соработувам со двете страни за да се осигурам дека тоа ќе се случи. САД сакаат наместо на тоа (војна) да се фокусираат на обнова и трговија. Пред нас е голема“,
објави Трамп на Трут соушл.