Зборувајќи на состанокот во Киев со холандскиот министер за надворешни работи Давид ван Вил, Зеленски потсети дека претходно добил уверување од кинескиот претседател Си Ѓинпинг дека Кина нема да ѝ испорачува оружје на Русија
Украинскиот претседател Володимир Зеленски денеска изјави дека Кина префрла машини за производство на оружје во Русија и го повика Пекинг да ја запре таквата поддршка и да го искористи своето влијание за да ја поттикне Москва за мир.
Зборувајќи на состанокот во Киев со холандскиот министер за надворешни работи Давид ван Вил, Зеленски потсети дека претходно добил уверување од кинескиот претседател Си Ѓинпинг дека Кина нема да ѝ испорачува оружје на Русија.
„Моите пораки се многу едноставни. Имавме телефонски разговори со Си Ѓинпинг. Тој ме увери дека оружјето нема да им се продава на Русите. Сепак, гледаме дека Кина ѝ дала машини за производство на оружје на Руската Федерација. Гледаме како Кина помага во заобиколувањето на санкциите. Гледаме дека има кинески платеници кои се бореле против украинската армија“,
изјави Зеленски, пренесе украинската државна новинска агенција Укринформ.
Зеленски нагласи дека Пекинг треба да изврши притисок врз Москва да ја запре агресијата, наместо да ги поддржува напорите што ја продолжуваат војната.
Коментарите дојдоа откако американскиот претседател Доналд Трамп изјави дека планира да разговара за војната на Русија во Украина со Си Ѓинпинг за време на нивниот претстоен состанок во Јужна Кореја на 30 октомври.
Трамп рече дека Си би можел да има значително влијание врз рускиот претседател Владимир Путин и додаде дека ќе го повика кинескиот лидер да престане да купува руска нафта.
Кина негираше дека ѝ обезбедува таква помош на Русија, но се соочува со зголемен надзор од Западот поради нејзината улога во снабдувањето со технологии за двојна употреба поради тековните санкции.