Рамзан Кадиров му одговори на украинскиот претседател преку својот канал на Телеграм, тврдејќи дека Зеленски сака да ги постигне своите цели преку други
Украинскиот претседател Володимир Зеленски ги повика САД да го засилат притисокот врз Русија со киднапирање на чеченскиот лидер Рамзан Кадиров, по истиот терк како со венецуелскиот претседател Николас Мадуро, велејќи дека таквата операција би можела да влијае на руското раководство.
„Еве, еве еден пример со Мадуро. Да, тие спроведоа операција. Сите ги видоа резултатите, целиот свет. Го направија тоа брзо. Па, нека спроведат некаква операција врз овој, како што се нарекува, Кадиров“,
изјави Зеленски.
На 3 јануари, американската војска ги уапси Мадуро и неговата сопруга Силија Флорес во нивниот дом во Каракас, и ги транспортира во Њујорк, каде што соборениот лидер е обвинет за наркотероризам.
Мадуро на првото појавување во судот изјави дека останува претседател на Венецуела.
Рамзан Кадиров му одговори на украинскиот претседател преку својот канал на Телеграм, тврдејќи дека Зеленски сака да ги постигне своите цели преку други.
„Забележете дека тој дури и не се закани дека ќе го стори тоа самиот. Тој ме става на списокот на барани лица и воведува санкции. Сега бара помош од Американците, велејќи: Ако не помогнаа со оружје, барем киднапирајте го Рамзан. Зачувај го образот и не понижувај се. Да имаше во тебе барем трошка машкост, ќе разбереше колку понижувачки звучат твоите зборови и барања“,
напиша чеченскиот лидер, истакнувајќи дека Зеленски претпочита да остане настрана и да гледа од безбедно растојание.
Ова не е прв конфликт меѓу Кадиров и украинските власти. Службата за безбедност на Украина (СБУ) претходно го прогласи Кадиров за барано лице, обвинувајќи го за спроведување агресивни воени дејствија и кршење на законите и обичаите на војување.
Од друга страна, Истражниот комитет на Русија го оквалификува тој потег како свесно доведување на невино лице пред кривична одговорност.