„Многу е важно да се зајакнат сите лостови што им се достапни на САД, Европа и Г7. Кремљ искрено ќе сака да ја запре војната кога ќе почувствува соодветен притисок“, изјави Зеленски
Украинскиот претседател Володимир Зеленски го повика денеска Вашингтон да го зголеми притисокот врз Русија за да ја принуди да ја прекине инвазијата врз Украина.
Украинскиот лидер ја даде изјавата во момент кога претставникот на американскиот претседател Доналд Трамп за Блискиот Исток, Стив Виткоф, пристигна во Москва.
„Многу е важно да се зајакнат сите лостови што им се достапни на САД, Европа и Г7. Кремљ искрено ќе сака да ја запре војната кога ќе почувствува соодветен притисок“,
напиша Зеленски на социјалните медиуми.
Зеленски, исто така, рече дека Русија нападнала складиште за гас во јужниот регион Одеса за да ги попречи подготовките за грејната сезона.
„Ова е намерен напад врз нашите подготовки за грејната сезона, апсолутно циничен, како и секој руски напад врз енергетскиот сектор“,
напиша Зеленски на Телеграм.
Претходно, регионалниот гувернер на регионот Одеса, Олег Кипер, соопшти за нападот прецизирајќи дека на местото избувнал пожар.
„Во моментов се работи на испуштање гас од системот. Како резултат на оштетувањето на главниот гасовод, 2 500 потрошувачи се привремено исклучени од системот“,
напиша Кипер на Телеграм.
Специјалниот пратеник на американскиот претседател Доналд Трамп, Стив Виткоф, денеска пристигна во Русија, откако Кремљ побара средба со него во последен обид да ги избегне новите казнени санкции што Трамп се закани дека ќе ги воведе неделава.