Соединетите Американски Држави соопштија дека понудиле силни безбедносни гаранции за Украина слични на правилата на НАТО и изразија уверување дека Русија ќе ги прифати. Ваквиот развој на настаните Вашингтон го оцени како пробив во напорите за завршување на војната
Украинскиот претседател Володимир Зеленски денеска изјави дека разговорите во Берлин со пратениците на американскиот претседател Доналд Трамп за ставање крај на војната со Русија не биле лесни, но оти донеле вистински напредок околу прашањето за безбедносни гаранции за Киев, јавуваат светските агенции, пренесува Дојче веле.
Европските лидери, според информациите, предложиле формирање европски мултинационални трупи, кои со поддршка на Соединетите Американски Држави (САД), ќе треба да го гарантираат мирот во Украина.
Овие трупи би биле дел од безбедносните гаранции од САД и европските сојузници за Украина со кои треба да се осигура дека Москва нема да го прекрши потенцијалниот мировен договор.
Инаку, денеска е втор ден како Зеленски одржува средби со специјалниот пратеник на Трамп, Стив Виткоф, и со зетот на американскиот претседател Џаред Кушнер за завршување на војната во Украина што ја започна Русија со целосна инвазија на земјата во 2022 година.
Разговорите се темелат на предлогот што првично беше изнесен од американскиот претседател.
Зеленски ги поздрави новите безбедносни гаранции понудени од Вашингтон, но, сепак, кажа дека остануваат разликите околу прашањето кои територии Украина би морала да ѝ ги отстапи на Русија.
„Имаше доволно дијалог за територијата и мислам дека, искрено кажано, сè уште имаме различни позиции“,
изјави Зеленски пред новинарите.
Германскиот канцелар Фридрих Мерц оптимистички наведе дека разговорите создале шанса за вистински мировен процес. Тој ги пофали САД за понудените, како што ги нарече, значајни безбедносни гаранции.
Во меѓувреме, Трамп од Вашингтон најави дека подоцна денеска ќе има телефонски разговор со Зеленски и група европски лидери, меѓу кои со британскиот премиер Кир Стармер и францускиот претседател Емануел Макрон.
На разговорите се очекува да присуствуваат и италијанската премиерка Џорџа Мелони, полскиот премиер Доналд Туск, финскиот претседател Александар Стуб, како и други лидери, заедно со генералниот секретар на НАТО, Марк Руте, како и претседателката на Европската комисија Урсула фон дер Лајен.
Соединетите Американски Држави соопштија дека понудиле силни безбедносни гаранции за Украина слични на правилата на НАТО и изразија уверување дека Русија ќе ги прифати. Ваквиот развој на настаните Вашингтон го оцени како пробив во напорите за завршување на војната.
Американските претставници, од своја страна, ги опишаа разговорите во Берлин како позитивни и рекоа дека Трамп во својот повик ќе се обиде да го турка договорот напред.
Тие предупредија дека Украина мора да го прифати договорот, кој, според нив, ќе обезбеди гаранции во согласност со членот 5 на НАТО – кој предвидува напад врз еден сојузник да се смета за напад врз сите.
„Основата на тој договор е да има навистина, навистина силни гаранции – слични на членот 5 – и многу силна одвратувачка моќ преку големината на украинската армија,“
изјави американски претставник, кој сакаше да остане анонимен.
Тој додал дека тие гаранции нема да бидат на маса засекогаш и оти сега се тука ако се постигне добар заклучок.
Трамп претходно исклучи формално членство на Украина во НАТО и се согласи со Русија дека аспирациите на Киев кон алијансата биле причина за целосната инвазија од Москва.
Германскиот канцелар Мерц изјави дека секој прекин на огнот мора да биде обезбеден со значајни правни и материјални гаранции од САД и Европа, кои САД ги ставија на маса овде во Берлин.
„Ова е навистина забележително. Многу важен чекор напред, кој го поздравувам,“
додаде тој.
Инаку, официјален извор информиран за разговорите претходно за новинската агенција АФП дека американските преговарачи сè уште сакаат Украина да се откаже од контролата врз источниот регион Донбас – составен од регионите Донецк и Луганск.
Според Институтот за проучување на војната со седиште во САД, Москва го контролира речиси цел Луганск и околу 80 проценти од регионот Донецк.
Друг американски претставник, исто така, призна дека засега нема договор околу прашањето за откажување на Киев од дел од украинската територија.
Русија, од своја страна, сигнализира дека ќе инсистира на своите клучни барања, вклучително и за територија и за Украина никогаш да не се приклучи на НАТО.
Портпаролот на Кремљ, Дмитриј Песков, денеска изјави дека Русија очекува САД да ја достават концепцијата што се дискутира денес во Берлин.
Мерц вети континуирана поддршка за Украина во борбата против она што го нарече 0„криминален напад на Путин“.
„Ќе можеме да постигнеме траен мир во Европа само заедно, со слободна и суверена Украина, силна Украина која може да се брани од руски напади сега и во иднина… Судбината на Украина е судбината на цела Европа“,
рече тој.