Зеленски вели дека руските сили преку ноќ лансирале вкупно 165 дронови за напад, од кои околу 100 биле „шахед“. Тој нагласи дека Украина ќе ја обнови оштетената болница и инфраструктура
Украинскиот претседател Володимир Зеленски вели дека во ноќен руски воздушен напад е погодена болница во Киев. Според Зеленски, во нападот има загинати и повредени лица, а пациентите морале да бидат евакуирани.
„Синоќа, руските војници ‘поразија’ друга болница – во Киев, со функционален болнички оддел. Пациентите морале да бидат евакуирани. Имало жртви. За жал, едно лице починало. Изразувам сочувство до семејството и најблиските. Секој на кого му е потребна помош ја добива“,
објави Зеленски на неговите профили на социјалните мрежи.
Државната служба за вонредни состојби на Украина соопшти дека нападот предизвикал пожар во медицински центар во областа Оболонски, во северниот дел на Киев. Откако пожарот бил изгаснат, телото на едно лице било пронајдено во зградата.
Според истите податоци, една жена е повредена, а 25 лица се евакуирани од објектот. Украинските власти велат дека ова се првите пријавени жртви на руските напади врз Киев оваа година.
Зеленски вели дека руските сили преку ноќ лансирале вкупно 165 дронови за напад, од кои околу 100 биле „шахед“. Тој нагласи дека Украина ќе ја обнови оштетената болница и инфраструктура.
„Украинците, секако, ќе ја обноват оваа болница. Такви сме ние – Украинците секогаш го обновуваат она што е уништено. Тимовите за опоравување, специјалистите за енергија и сите клучни служби веќе работат во регионите каде што Русите предизвикаа нови штети и нови прекини на електричната енергија“,
додава Зеленски.
Украинскиот претседател нагласи дека поддршката од сојузниците е неопходна секој ден.
„Исклучително е важно нашите партнери никогаш да не заборават: воздушната одбрана е потребна секој ден, финансирањето за производство на дронови-пресретнувачи е потребно секој ден, опремата за енергетскиот сектор е потребна секој ден“,
рече Зеленски.
Тој додава дека Украина во текот на оваа недела ќе работи со европските и американските партнери за да се обезбеди потребната помош.
За напади во областа Фастив на Телеграм објави регионалниот гувернер, Микола Калашник.
„Русија нападна градови и села низ регионот на Киев преку ноќ. Домови и клучна инфраструктура беа оштетени, а еден цивил беше убиен во областа Фастив, југозападно од Киев. Делови од регионот останаа без електрична енергија како резултат на нападот“,
вели Калашник.