Украинскиот претседател тврди дека платеничката група претрпела огромни загуби во борбите во источна Украина. Бројката за која зборува Володимир Зеленски не се однесува и на ранетите припадници на „Вагнер“
Најмалку 21 000 платеници на „Вагнер“ се убиени во борбите во Украина, вели претседателот Володимир Зеленски. Лидерот на Украина тврди дека приватната воена фирма со која управува Евгениј Пригожин претрпела огромни загуби, особено во источна Украина, каде што се бореле нејзините најподготвени формации.
„Нашите војници убиле 21 000 ‘вагнеровци’ само во источна Украина. Тоа се огромни загуби за ‘Вагнер’, чии борци се поранешни припадници на руската армија осуденици кои немаат што да загубат“,
изјави Зеленски за време на прес-конференцијата со шпанскиот премиер Санчез во Киев.
Санчез допатува во Украина како симболичен гест со кој се одбележа почетокот на шпанското претседателство со Советот на Европската Унија. Непосредно пред шпанскиот премиер, во Киев беше и директорот на ЦИА, Вилијам Барнс, кој се сретна со украинскиот државен врв за да разговара за причините и последиците од неодамнешниот неуспешен пуч на „Вагнер“.
Иднината на групата „Вагнер“ засега е нејасна. Разузнавачките информации се дека дел од платениците најверојатно, заедно со Пригожин, заминале во Белорусија каде што се подготвува база во која би се стационирале. Белорускиот претседател Лукашенко пред неколку дена изјави дека групата „Вагнер“ и нејзиното знаење би можеле да бидат искористени за обука на армијата на Белорусија.