Основниот кривичен суд Скопје денеска ги прогласи Љубе Крстевски и Бранко Билбиловски за виновни за убиство на кучето Феликс, кое почина на 7 јануари годинава како последица од нанесените повреди
Во одделни реакции, иницијативата Зелен хуман град и здружението за заштита на животните Анима Мунди ја поздравија судската одлука со која Љубе Крстевски доби првостепена пресуда, затворска казна од три месеци за убиство на кучето Феликс кое се случи во ноември минатата година.
Во реакцијата се вели дека ефективна затворска казна била изречена за прв пат во историјата на земјата и оти пресудата е доказ дека кога граѓаните се борат има ефект и оти промените се случуваат. Дополнително, ја цитираа судијката Лидија Петровска која при изрекувањето на пресудата, меѓудругото рече и оти станува збор за дело кое предизвика висока јавна чувствителност и морална загриженост особено во контекст на зголемениот број на случаи на суровост кон животните и дека со изрекувањето на затворска казна се испраќа порака дека ваквите постапки во иднина нема да се толерираат.
„Ќе се жалат, ама ќе се жалиме и ние! Но денес ќе славиме и ќе се сеќаваме на милиот Феликс! Ќе се сеќаваме на секое друго животно што настрадало од човечка рака! Ниедно не е заборавено! Нема да се откажеме и ќе се бориме до крај! Додека и последното живо суштество не го добие правото што му припаѓа по раѓање – да живее живот во слобода“,
велат од ЗХГ.
Од Анима Мунди велат дека Феликс не бил само куче, туку жртва која стана симбол, а од денес и преседан. Велат дека тие заедно со ЈП Лајка поднеле кривична пријава која ја добиле оти не молчеле во името на Феликс и на сите животни за кои немало правда. Оваа пресуда, велат, испраќа суштинска порака дека животното не е предмет и оти насилството носи последици.
„Затоа што злосторства нема да остануваат неказнети. Никогаш повеќе. Случајот со Феликс беше тест – за институциите, за моралот, за државата. Денес, системот покажа дека може да биде на страната на хуманоста, кога постои волја“,
велат од Анима Мунди.
Инаку, денеска Основниот кривичен суд Скопје ги прогласи Љубе Крстевски и Бранко Билбиловски за виновни за убиство на кучето Феликс, кое почина на 7 јануари годинава како последица од нанесените повреди. Судот на Крстевски му одреди казна затвор од три месеци, додека Билбиловски е санкциониран парично, односно треба да плати сто дневни глоби со вредност од 10 евра по глоба или вкупен износ од 1 000 евра, пренесе МИА.