Имаме капацитет да се справиме со напливот на пациенти и има доволно слободни кревети за нивната интензивна нега, особено што од идната недела на голем дел ќе им заврши периодот од три недели и ќе почне да се испишуваат, изјави денеска министерот за здравство Венко Филипче за време на посетата на Прилеп.
Тој потврди дека има поголем број пациенти, посебно во болницата „8 Септември“ и на Инфективната клиника, поради што почнала ротација на лекари и сестри од сите јавно-здравствени установи во државава.
„Во овие две клиники има сосема доволен број слободни кревети и пристап до респираторни машини. Предвидени се и други институции кои сега се слободни. Има слободни места и во модуларната болница до Инфективната клиника, и во ‘8 Септември’ и во сите други болници каде има инфективни одделенија. Следната недела почнува циклусот на испишување пациенти зашто поминал периодот од три недели од почетокот на овој бран и нивното лекување веќе привршува. Така што, сметам дека тоа е голем предизвик кој засега добро го менаџираме“,
рече Филипче.