Министерот за здравство Венко Филипче смета дека здравствениот систем и здравствените работници во земјава одлично се справија со пандемијата од ковид-19.
Во интервју за Алсат М, Филипче ги посочува сликите од болниците во Италија и во некои делови во Шпанија каде што немаше место каде да се сместат пациентите и потенцираше дека тоа кај нас не се случи.
„Во ниту еден момент на Инфективната клиника, како централна јавно-здравствена установа каде што се сместуваат овие пациенти, капацитетот не беше пополнет повеќе од 60-65 проценти. Во ГОБ ‘8 Септември’, никогаш повеќе од 5 проценти“,
вели Филипче за Алсат.
Според него, епидемиолозите, од аспект на превенција, раната детекција и дијагнозата и инфектолозите и интернистите во однос на третманот на пациентите, дадоа одлични резултати во менаџирање на кризата.
„Нашите здравствени работници одговорија многу брзо и на највисоко експертско стручно ниво. И во однос на раната детекција и превенцијата и во однос на оној клинички дел, односно третманот на пациентите. Ние бевме меѓу првите земји коишто ставија термални камери за детекција на аеродромите, меѓу земјите коишто сметам дека направија одлична стратегија во однос на дијагностицирање, начин на пристап, анализа на пациентите и идентификувањето на нивните контакти, како и третманот на пациентите. И сето тоа во рамките на капацитетите на нашиот здравствен систем“,
истакнува Филипче.