Шефот на руската делегација во преговорите со Украина, Владимир Медински, пак, рече дека Русија предложила Украина да размисли за прогласување серија краткорочни прекини на огнот во траење од 24 или 48 часа со цел евакуација на ранетите или телата на загинатите
Завршија преговорите меѓу делегациите на Русија и Украина, трети по ред, што вечерва се одржаа во Истанбул и траеја помалку од еден час.
Претходно се одржа билатерална средба на шефовите на двете делегации, како Владимир Медински и Рустем Умеров, по што следуваа консултации на руската делегација.
На почетокот на средбата, говор одржа министерот за надворешни работи на Турција, Хакан Фидан, кој им се заблагодари на претседателите на Русија, Украина и Соединетите Американски Држави (САД), Владимир Путин, Володимир Зеленски и Доналд Трамп, за нивните напори за организирање на преговорите.
Украина и Русија се согласија за нова размена на затвореници за време на последната рунда мировни преговори во Истанбул. Размената ќе вклучува и воени затвореници и цивили.
„Главниот резултат е размена не само на војската, туку и на цивилите“,
велат извори што учествувале на преговорите.
Шефот на украинската делегација на преговорите во Истанбул, Рустем Умеров, изјави за медиумите дека Украина е подготвена за примирје и ја повика Русија да покаже конструктивен и реалистичен пристап.
Шефот на руската делегација во преговорите со Украина, Владимир Медински, пак, рече дека Русија предложила Украина да размисли за прогласување серија краткорочни прекини на огнот во траење од 24 или 48 часа со цел евакуација на ранетите или телата на загинатите.
„Ќе бидат разменети околу 1 200 луѓе од двете страни“,
кажа Медински за исходот од преговорите.
Според него, сите хуманитарни договори од втората рунда се исполнети и досега е завршена голема размена на заробеници.
„Москва врати во Киев повеќе од седум илјади тела на загинати војници на украинските вооружени сили“,
рече тој.
Резултатот од првата рунда прееговори што се одржа на 16 мај беше договор за размена на затвореници според формулата „1 000 за 1 000“ и одлука за поднесување меморандум на страните за аспектите на надминување на кризата.
По втората средба на 2 јуни, страните разменија нацрт-меморандуми за мирно решение, а исто така се согласија и за размена на тешко ранети воени затвореници, како и на телата на загинатите.
Дмитриј Песков, портпаролот на Кремљ, претходно рече дека усогласувањето на нацр-меморандумот меѓу Москва и Киев може да се смета за подготвителен процес за можна средба меѓу Владимир Путин и Володимир Зеленски.
Украина и Русија во мај започнаа директни разговори првпат по повеќе од три години.