Заев, Ахмети и Ковачевски исто така истакнале дека очекуваат следните парламентарни избори да се одржат во 2024 година
Премиерот во оставка Зоран Заев, новоизбраниот лидер на СДСМ, Димитар Ковачевски и претседателот на ДУИ, Али Ахмети, попладнево имаа работна средба заедно со своите тимови, во рамки на консултативните средби за владините приоритети, за преземањето одговорности и за одржувањето и надградувањето на владиното и парламентарно мнозинство, информираат од Влада.
На состанокот се разговарало за обезбедувањето на стабилно парламентарно мнозинство, како и за идните предизвици на Владата.
„Заев, Ахмети и Ковачевски се согласни дека новата Влада ќе биде целосно фокусирана на забрзано движење на државата по евро-атлантскиот пат и дека целта е првиот голем успех на Владата да биде наоѓањето решенија за предизвиците во односите со Бугарија и почеток на преговорите за членство во Европската Унија“,
се вели во соопштението на Владата.
На средбата станало збор и за парламентарните избори, за кои тројцата функционери потврдиле дека очекуваат да се одржат во 2024 година, а дотогаш нагласиле дека ќе продолжат да се борат со пандемската и енергетската криза.