Засега се одобрени барањата на 29 народни избраници од претходниот состав на парламентот, а се поднесени и други барања кои се разгледуваат. Право на апанажа од минатиот состав на парламентот имаат 57 пратеници зашто не се дел од новиот
Дваесет и девет пратеници од минатиот парламентарен состав добија одобрение од собраниската Комисија за избори и именувања да земаат апанажа. Засега се одобрени барањата на 29 народни избраници од претходниот состав на парламентот, а се поднесени и други барања кои се разгледуваат.
Од вкупно 29 пратеници кои досега побарале и на кои им е одобрена апанажа, 26 ќе го добиваат надоместокот во текот на една календарска година, односно 12 месеци. Една година правото на апанажа ќе го користат Жаклина Лазаревска, Соња Михајловска, Ненад Коциќ, Марија Георгиевска, Санела Шкриељ, Дарко Каевски, Марија Костадинова, Марија Ангелова, Емилија Рамбабова, Љупчо Балковски, Белкиса Зеќири, Даниела Колева, Бајрам Кадрија, Атнан Незири, Лолита Ристова, Диме Велковски, Артина Ќазими, Марија Кочовска, Мухамед Кадриов, Игор Јанушев, Маја Морачанин, Боби Мојскоски, Кастриот Реџепи, Лазе Таневски, Мартин Костовски и Мирче Аџиовски.
Мирослав Јовановиќ од Српската странка во Македонија ќе прима апанажа само два месеца, односно до стекнување на правото на пензија. До стекнување на правото на пензија во периодот од шест месеци апанажа ќе зема и Абдула Салиу од Алијанса за Албанците, а поранешниот пратеник Ремзи Мехмеди девет месеци.
Право на апанажа од минатиот состав на парламентот имаат 57 пратеници зашто не се дел од новиот. Рокот за поднесување на барањето за апанажа завршува на 28 јуни.
Според Законот за плата и другите надоместоци на пратениците во Собранието и другите избрани и именувани лица, тримесечна апанажа добива пратеник ако функцијата ја вршел до шест месеци, апанажа во времетраење од шест месеци добива пратеник кој бил на функцијата од шест месеци и еден ден до 12 месеци, деветмесечна апанажа добива пратеник ако функцијата ја вршел од 12 месеци и еден ден до 24 месеци и едногодишна апанажа добива пратеник ако функцијата ја вршел 24 месеци и еден ден и повеќе.
Апанажата е во висина на платата на пратениците и ја исплаќа Собранието.