Има јасни сознанија дека природниот имунитет по прележување на болеста со тек на време се намалува, а вакциналниот е оној кој е потраен, вели министерот за здравство, Венко Филипче
Ковид-центрите во Тетово и Гостивар се целосно исполнети со пациенти, па затоа дел од пациентите на кои им е потребно холпитализирање ќе се препраќаат во Скопје
Засега нема препораки за промена на одлуките за присуство на настани на отворено, односно не се разгледува можноста граѓани да може да приложат негативен ПЦР-тест и за присуствуваат на отворен настан од културата, спортот или прослава.
Ова го кажа министерот за здравство, Венко Филипче, одговарајќи на новинарско прашање дали се размислува за промена на одлуките по реакциите од јавноста и угостителите.
„Целта е да се подигне степенот на вакцинација и да се постигне колективен имунитет. Зошто граѓаните да се изложуваат на дополнителни трошоци со секојдневно правење на ПЦР-тестови за да може да присуствуваат на некој настан. Вакцината е спасот и токму тоа е причината зошто ги носиме овие одлуки“,
рече Филипче.
Тој образложуваше дека луѓето кои прележале ковид треба да се вакцинираат по 45 дена од прележувањето, бидејќи тоа се препораки од повеќе релевантни научни студии кои покажале дека природниот имунитет се намалува, а вакциналниот бил потраен.
„Прво граѓаните мора да знаат дека додека сите не се вакцинираме ова нема да престане. Има јасни сознанија дека природниот имунитет по прележување на болеста со тек на време се намалува, а вакциналниот е оној кој е потраен. Американскиот центар за контрола на болести тоа го кажа, а го укажа и Светската здравствена организација. Дури и десет дена по тестирањето кај асимптоматските случаи се препорачува вакцинирање. Сите препораки водат кон тоа за што пократко време луѓето да се имунизираат. Има студии кои покажуваат дека прележаните имаат имунитет и по пет и по осум месеци, но тој се намалува. Бидејќи имаме препораки за што поскоро вакцинирање, важно е граѓаните да го сторат тоа. Што побрзо се подигне степенот на вакцинација и се постигне колективен имунитет, затоа што вакциналниот имунитет е траен ќе спречиме и следни бранови. Ние мора ова да го прекинеме еднаш, не можеме повторно да се соочуваме со тешки бранови и тоа е логиката на овие 45 дена препорака да се вакцинираат прележаните“,
рече Филипче.
Тој информира дека процесот на имунизација се одвива добро и организирано во сите вакцинални пунктови, а најави и повторно отворање на салата „Борис Трајковски“ како вакцинален пункт поради зголемениот интерес кај граѓаните да се имунизираат.
„Сега ќе биде отворена помалата сала во ‘Борис Трајковски’, но ќе има околу 20 места каде ќе може да се спроведе вакцинацијата и верувам дека тоа ќе ги растерети гужвите и редовите кои ги има во Здравствените домови“,
рече Филипче.
Тој кажа дека ковид-центрите во Тетово и Гостивар се целосно исполнети со пациенти, а делумно и болниците во Кичево и Струга.
„Во Скопје е целосно исполнета Инфективната клиника заедно со модуларната болница, над 130 пациенти се хоспитализирани, а од денеска почнува да работи болницата за Рехабилитација во Козле каде има 120 кревети кои се снабдени со централен довод на кислород. Континуирано сме во комуникација со директорите на тетовската и гостиварската болница, на секој пациент на кој му е потребна болничко лекување го праќаат тука во Скопје“,
рече Филипче.