Министерот за правда Бојан Маричиќ, одговарајќи на новинарско прашање дали има напредок во овој случај, посочи дека институциите од Србија не стапиле во контакт со Министерството
Министерство за правда не отворило постапка за барање екстрадиција на дипломатот Миле Миленковски, кој се наоѓа во притвор во Србија, изјави денеска министерот за правда Бојан Мариќиќ, а причината за тоа е што не сме добиле информација по основа на која треба да бара екстрадиција или трансфер на осудено лице.
На новинарско прашање дали има напредок во овој случај, тој посочи дека институциите од Србија не стапиле во контакт со Министерството за правда.
„Јас ги имам информациите што ги имаат веројатно и јавноста и дел од владините функционери. Министерството за правда нема тука никаква улога, бидејќи лицето што е во притвор, нашиот дипломат што е во притвор во Србија, нема кај нас отворена постапка по која ние би го барале како држава“,
рече Маричиќ.
Тој објасни дека може да се бара екстрадиција или трансфер на осудено лице, меѓутоа, како што рече, дипломатот сè уште не е ниту осуден ниту, пак, кај нас има постапка врз основа на која ќе треба да го бараат. Маричиќ рече дека министерствата од Србија не стапиле во никаков контакт со Министерството за правда, а нема информација дали стапиле во контакт со Министерството за внатрешни работи.
Министерот за надворешни работи Бујар Османи, на почетокот на месецов, одговарајќи на новинарско прашање зошто потпишал Миле Миленковски, кој од 27 август е уапсен во Србија по меѓународна потерница, да замине во нашата мисија во Виена, изјави дека овој случај покажал слабости во координацијата во повеќе институции и во МНР, но, како што истакна, драго му е што тој дипломат бил упатен во нашата мисија во ОБСЕ во Виена, бидејќи ако не беше, тој и натаму ќе имал дипломатски пасош, национален сертификат и пристап до документи.
Тој на прес-конференција го образложи целиот случај и најави дека по ова ќе следува ветинг за сите дипломати.
Ден претходно, министерот за внатрешни работи Оливер Спасовски изјави дека не бил на чело на МВР кога била распишана меѓународната потерница за дипломатот од македонското МНР, на 25 февруари 2020 година. Спасовски потсети дека во тоа време беше претседател на техничката влада, која беше избрана да ги спроведе ланските парламентарни избори.
Спасовски посочи и дека во 2019 година стигнале првите информации за можна вклученост на македонски дипломати во одредена постапка, за што, како што рече, веднаш било известено Министерството за надворешни работи.
Премиерот Зоран Заев, пак, изјави дека македонските власти ќе постапат согласно сите меѓународни договори што сме ги прифатиле, потврдиле и поддржале, но оти ќе се побараат и сите правни акти за заштита на нашите граѓани.
Поврзана вест: