Шефовите на држави и влади од околу дваесет земји и претставници на десетина меѓународни и регионални организации, меѓу кои и Владимир Путин, уште вчера почнаа да пристигнуваат во пристанишниот град Тјенџин каде што ќе се сретнат со Си Ѓинпинг
Претседателот на Кина, Си Ѓинпинг, денеска и утре ќе биде домаќин на лидерите на Русија, Индија, Иран и Турција, заедно со дваесет други евроазиски лидери, со цел да покаже дека во ерата на американските царини и геостратегиските тензии е можен поинаков меѓународен модел на соработка, со Кина во центарот.
Шефовите на држави и влади од околу дваесет земји и претставници на десетина меѓународни и регионални организации уште вчера почнаа да пристигнуваат во пристанишниот град, кој во минатото, кога се викаше Тјанцин, имаше концесии од западните земји, како и од Јапонија и Русија, а сега е симбол на економската виталност на Кина.
Рускиот претседател Владимир Путин утринава пристигна во Кина.
Индискиот премиер Нарендра Моди допатува вчера во прва посета на Кина од 2018 година, што е знак на зближување меѓу двата азиски гиганти. Моди беше примен од кинескиот претседател.
Самитот е под силен полициски и воен надзор. Оклопни возила се поставени на некои улици.
Самитот, опишан како најважен од создавањето на Шангајската организација во 2001 година, се одржува во услови на повеќекратни кризи кои директно влијаат на неговите членови: трговскиот конфликт на САД со Кина и Индија, војната во Украина, иранскиот нуклеарен спор и други.
Шангајската организација собира 10 земји членки и 16 земји набљудувачи или партнерски земји и претставува речиси половина од светското население и 23,5 отсто од БДП на планетата.
За време на самитот, Кина има намера да го покаже своето дипломатско влијание, но и својата воена моќ, претставувајќи се како столб на стабилност во поларизиран свет.
Путин и неколку други учесници в среда ќе бидат сведоци на демонстрација на воената моќ на нивниот домаќин, заедно со грандиозна парада во Пекинг по повод 80-годишнината од крајот на Втората светска војна и победата над Јапонија.
За оваа пригода, севернокорејскиот лидер Ким Џонг ун ќе направи ретко патување надвор од својата изолирана земја, со цел да застане покрај Си Ѓинпинг во соседна и сојузничка Кина.