Започната е процедура за впишување на црквата „Св. Ѓорѓи“ во Курбиново на листата на светско кулурно наследство на УНЕСКО.
Ова за емисијата „Утрински брифинг“ на Слободна ТВ го соопшти Јасмина Шопова, советничка на министерката за култура.
„Ние имаме едно културно добро запишано на таа престжна листа и тоа е Охрид, кој е меѓу првите и е од 1979 година. Од тогаш до сега немаме запишано ниту едно друго национално добро. Тоа се многу години, во меѓувреме тоа е проширено на Охридски регион, тоа е направено, меѓутоа, не повеќе од тоа. Најголемиот чекор што го направивме за овие два месеци е започнувањето на процедурата за запишување на црквата „Св. Ѓорѓи“ во Курбиново на светската листа на културни добра на УНЕСКО“,
вели Шопова.
Таа појаснува дека иако се работи за долг процес, поради променетите процедурите при што прво доброто се впишува на пробна листа со елаборат што треба да се развива неколку години, тоа е направено.
„Придобивките од впишувањето на Курбиново можат да бидат огромни, но сè зависи од нас“,
вели Шопова, додавајќи дека тоа прво е прашање на престиж, поради што повеќе од 190 земји членки на УНЕСКО буквално се борат за да впишат некое нивно добро на таа листа.
Потоа, тоа е меѓународна помош преку меѓународни експерти и трето, тоа се економските придобивки од култуните добра коишто ние може да ги добиеме.
„Ако ние имаме 6 впишани култуни добра тоа би значело дека тие ни носат околу 15 милиони евра. Дали ни носат толку средства, не знам, но ако се работи на тоа, ако се развива културен туризам, да се добиваат фондови за публикации, да се работат проекти кои генерираат средства, тоа значи културата, како што знаеме, носи приход“,
вели Шопова за Утрински брифинг.
Пред четири дена, министерката за култура, Ирена Стефоска, најави дека Завод и Музеј – Битола ги започна конзерваторско-реставраторските работи на архитектурата на црквата Св.Ѓорги во Курбиново.
„Ова е прва посериозна интервенција, по речиси 3 децении, за заштита на непроценливото културно наследство од 12 век“,
соопшти Стефоска.