Присутни се поголем број граѓани, со албански знамиња и обележја на ОВК, а улицата која води кон паркингот во ТЦ Мавровка е затворена за сообраќај
На плоштадот „Скендербег“ во Скопје, пред дваесетина минути започна собирот за поддршка на поранешните команданти на Ослободителната војска на Косово, кои чекаат судење во Меѓународниот кривичен суд во Хаг. Репортерот на 360 Степени од терен, известува оти плоштадот „Скендербег“ кај Скопската чаршија и паркингот пред плоштадот се полни, сообраќајот кон паркингот на ТЦ Мавровка е затворен, а присутни се поголем број граѓани, со албански знамиња и обележја на ОВК.
Протестот за поддршка на поранешните водачи на ОВК на кои им се суди во Судот во Хаг е организиран од лидерот на ДУИ, Али Ахмети.
„По Приштина и Тирана, сега и Скопје ќе зборува за вистината и правдата! Војната на ОВК беше и останува праведна, ослободителна и поддржана од демократскиот свет. Правдата за борците за слобода не може да се гради врз политички обвинувања и измислени докази од страна на Србија и Русија. Како што бевме покрај борците на ОВК во Приштина и Тирана, така ќе застанеме и во Скопје, горди и решителни во одбрана на нашата вистина“,
објави тој во поканата.
Коментирајќи го најавениот протест, премиерот Христијан Мицкоски изјави дека Ахмети прави обид да се мобилизира пред партискиот Конгрес на ДУИ, но оцени дека ова е погрешен чекор поради кој во иднина тешко ќе може да најде политички партнер. Според Мицкоски, протестот дополнително ќе го изолира лидерот на ДУИ и ќе го обележи како генератор на нестабилност во државата.