Очекувањата се инвеститорот „Алказар енерџи партнерс“ да вложи околу 500 милиони долари за изградба на 55 ветерници во близина на општините Штип, Карбинци и Радовиш
Откако пред една година премиерот Христијан Мицкоски ја најави, денеска со поставување свечен камен-темелник беше обележано започнувањето на изградбата на најголемиот ветерен парк во регионот, кој би требало да се протега на површина од 326 хектари и да произведува електрична енергија за 100 илјади домаќинства.
Премиерот Христијан Мицкоски рече оти оваа инвестиција треба да биде мотор и модел во однос на тоа каде треба земјата да се движи во иднина и оти е задоволен што една година по најавата, првата фаза добива завршница.
„Ако нема дисциплина и јасна поставена структура на еден проект, нема ништо. Тогаш ќе почне да ви се распаѓа сето она коешто го градите и на крајот нема да стигнете до посакуваната цел, а нашата посакувана цел беше денешниот камен-темелник. Имаме уште многу идеи како оваа инвестиција може да додаде уште поголема вредност и да биде уште позначајна и за компанијата инвеститор и за нас како држава, но тоа ќе го разговараме во некоја следна фаза“,
рече Мицкоски.
Вицепремиерот Александар Николоски рече оти овој проект ќе создаде над 600 работни места за време на изградбата и оти ќе се активира целата инфраструктурна мрежа околу него, додека, пак, во видеообраќање, министерката за енергетика Сања Божиновска рече оти е ова не е еднократна инвестиција, туку долгорочна стратешка ориентација на земјата.
„Не само што го менуваме начинот на кој произведуваме енергија, туку го менуваме и нашето размислување. Оваа инвестиција ќе обезбеди нова енергетска инфраструктура, стабилен систем и директен придонес кон интеграцијата на Македонија во европскиот енергетски пазар. Нашата земја не само што ќе произведува за себе, туку ќе произведува и за регионот“,
рече Божиновска.
Со оваа инвестиција, очекувањата според коосновачот и управувачки партнер на „Алказар енерџи“, Даниел Калдерон, се дека ќе се создаде почиста средина, ќе се намали загадувањето и ќе поевтини цената на струјата за граѓаните на земјава.
„Заедно сме посветени на обезбедување долгорочни придобивки за локалните заедници и на поддршка на амбициите за енергетска безбедност на Северна Македонија“,
рече Калдерон.
Очекувањата се инвеститорот „Алказар енерџи партнерс“ да вложи околу 500 милиони долари за изградба на 54 ветерници во близина на општините Штип, Карбинци и Радовиш.