Во најголемото албанско пристаниште Драч, во камион натоварен со хром, синоќа се откриени и запленети 45,5 килограми хероин.
„Постојаната оперативна група која работи во пристаништето Драч, врз основа на добиени информации, врши детална контрола врз моторните возила на излез и влез во пристаништето. При контрола на излез во втора линија, во товарно возило тип ‘сканија’, поточно во кабината на камионот, пронајдени се скриени 43 пакувања со хероин, со вкупна тежина од 45,5 килограми“,
се наведува во полициското соопштение.
Според полицијата, постојат основи на сомненија дека дрогата требало да заврши на италијанскиот наркопазар.
Уапсени се сопственикот на возилото, кој е од Драч, како и возачот од градот Фиер. И двајцата негирале дека имаат каква било поврзаност со дополнителниот товар во камионот.
Во Драч на 18 јуни беа запленети 324 килограми кокаин, во камион натоварен со железо, со крајна дестинација Италија, со кој управувал Н.А. македонски државјанин.