Западните земји со реакции за ситуацијата во Русија: Внимателно ги следиме настаните

Лондон тврди дека Вагнер на Пригожин преминал од деловите на Украина окупирани од Русија во Русија на најмалку две локации и „речиси сигурно“ зазел клучни безбедносни позиции во Ростов на Дон

Велика Британија, Франција, Германија, Полска и Италија одделно соопштија дека внимателно ги следат настаните во Русија, откако шефот на приватната воена формација Вагнер започна бунт против руските власти.

„Во следните часови, лојалноста на руските безбедносни сили, а особено на Националната гарда, ќе биде клучна за развојот на оваа криза. Ова е најзначајниот предизвик за руската држава во последно време“,
се наведува во редовниот разузнавачки билтен на британското Министерство за одбрана.

Лондон тврди дека Вагнер на Пригожин преминал од деловите на Украина окупирани од Русија во Русија на најмалку две локации и „речиси сигурно“ зазел клучни безбедносни позиции во Ростов на Дон.

„Дополнителни единици на Вагнер се движат на север низ регионот Воронеж речиси сигурно со цел да стигнат до Москва“,
се вели во соопштението.

Се додава дека има „многу ограничени докази“ за борби меѓу Вагнер и руските безбедносни сили.

Британското Министерство за надворешни работи во ажурираните упатства до британските граѓани соопшти дека извештаите укажуваат на „воени тензии во регионот Ростов и ризик од дополнителни немири во земјата“.

Полскиот претседател Анджеј Дуда на Твитер објави дека претпладнето одржал консултации со премиерот и министерот за одбрана, како и со сојузниците, во врска со ситуацијата во Русија.

„Текот на настаните надвор од нашата источна граница континуирано се следи“,
напиша тој.

Елисејската палата соопшти дека претседателот Емануел Макрон внимателно ја следи ситуацијата во Русија.

„Остануваме фокусирани на поддршката на Украина“,
соопшти Елисејската палата.

Портпаролот на германската влада најави дека владата „внимателно ги следи настаните во Русија“.

Кабинетот на италијанскиот премиер Џорџија Мелони објави дека Мелони „внимателно ги следи настаните во Русија кои покажуваат дека нападот врз Украина предизвикува нестабилност во Русија“.