Третата бескаматна кредитна линија од 31 милион евра станува достапна за микро и малите фирми. Оваа мерка е дел од ковид-помошта во текот на кризата, а парите – 30 милиони евра се обезбедени од ИПА-програмата, додека еден милион евра е од државата програма за справување со последиците на вирусот.
Третата линија на бескаматни кредити денеска ја промовираа вицепремиерот за економски прашања Фатмир Битиќи, директорот на Развојната банка Кире Наумов и евроамбасадорот Дејвид Гир.
Јавниот повик за овие бескаматни кредити денеска го објави Развојната банка и, како што посочи Битиќи, за нив може да аплицираат микро и мали трговски друштва, трговци поединци и занаетчии чие работење е погодено од коронавирусот, а може да се измери преку падот на приходите.
„Во оваа трета кредитна линија, на барање на Занаетчиските комори, првпат е проширен таргетот на кредитната линија и им е дадена шанса и на занаетчиите кои имаат пад на своите приходи најмалку 20%, да можат да понесат кредитно барање за кредит со 0% камата. Очекуваме третата линија да поддржи 2.000 микро и мали субјекти“,
вели Битиќи.
Шефот на делегацијата на ЕУ во Скопје, амбасадорот Дејвид Гир, подвлече дека бескаматната кредитна линија е дел од голем финансиски пакет обезбеден од ЕУ во вредност од 40 милиони евра.
Од овој пакет, 30 милиони евра се дел од оваа бескаматна линија, додека останатите ќе бидат наменети за невработените кои сакаат да започнат бизнис.
„Останатите 10 милиони евра ќе бидат управувани од Агенцијата за вработување, се со цел да им се помогне на луѓето кои се без работа, а сакаат да основаат почетен бизнис, како и да им овозможи на микро, на малите и средните претпријатија да креираат нови можности за работа. Во исто време овој пакет ’EU4resilience‘ – ’ЕУ за отпорност‘ ќе охрабри инвестиции во зелената и дигитална транзиција, прашања коишто го заземаат врвот на агендата на Европската Унија, истовремено промовирајќи можности за жените како и за младите лица“,
нагласи Гир.
Кредити до 5 000 и 15 000 евра
Директорот на Развојната банка Кире Наумов, пак, ги презентираше деталите околу кредитите и нагласи дека ќе бидат со 3 години рок на отплата и вклучен грејс-период од 6 месеци. Парите што ќе се доделат ќе може да се користат за набавка на основни и обртни средства заради непречено финансирање на тековните активности и потребата од обртен капитал на субјектите.
Трговец поединец и занаетчија ќе можат да аплицираат за кредит од минимален износ од 3 000 евра, а максимум до 5 000 евра. За микро и малите трговски друштва, пак, до 15 000 евра.
„Почетокот за доставување кредитни барања за ‘Ковид 3’ е на 16 декември од полноќ. Кредитни барања ќе може да се доставуваат сè до 30 декември до полноќ, односно повикот трае вкупно 15 дена. Пристигнатите кредитни барања ќе се обработуваат по завршување на јавниот повик, хронолошки, по принципот ’прв дојден, прв услужен‘“,
појасни Наумов.
Аплицирањето ќе биде исклучиво електронски на е-маил адресата [email protected].
Грантови за четири категории фирми
Новина во оваа кредитна линија е грант-компонентата од 30% која корисниците на кредит од ‘Ковид 3’ ќе можат да ја добијат. Грант-компонентата се однесува на четири категории субјекти, и тоа:
- Прва категорија субјекти се оние кои се управувани од жена, или пак имаат во сопственичката структура жена или жени со учество од најмалку 50%;
- Втора категорија субјекти се оние кои се управувани од млади лица до 29 години согласно европската дефиниција за млади, или пак имаат млади во сопственичката структура од најмалку 50%;
- Трета категорија субјекти се извознички компании, кај кои учеството на приходите од странство во вкупните приходи е најмалку 50%;
- Четврта категорија е најширока, а се однесува на субјекти кои реализираат активности, односно проекти во областа на зелена економија, модернизација и дигитализација на деловните процеси преку набавка на опрема или воведување нов начин на продажба, како и иновација од аспект на воведување на нови производи и нови услуги.
Овие фирми грантот ќе може да го добијат откако ќе отплатат 50% од кредитот и ќе поднесат барање за грант до Развојната банка.
