Од комората сметаат дека треба да постои министерство за храна кое ќе биде целосно надлежно за прашањата од оваа проблематика
Граѓаните ќе имаат ограничен пристап до основните животни продукти, а ќе се наруши и веќе тешката состојба во која се наоѓаат претпријатијата, доколку парцијалните решенија не се носат без соодветна анализа, како што е одлуката за определување на највисоките цени на прехранбените продукти во трговијата на големо и мало, сметаат од Агро-бизнис комората при Сојузот на стопански комори на Македонија.
Според Горан Георгиевски, потпретседател на Агро-бизнис комората, за да има позитивен ефект одлуката за ограничување на цените на одредени производи, потребно е да биде донесена во корелација со други мерки.
„Имено во дадени услови на многукратно зголемени трошоци на инпутите во производните процеси, а при забрана за зголемување на цените на крајните производи единствено можно решение е прекин на производството и отпуштање на вработените. Исто така, можно е и стимулирање на сивата економија, бидејќи во неможност производите да се набават по регуларен пат граѓаните ќе бидат принудени да ги набавуваат на друг начин што ќе донесе и до формирање на цени кои се многу повисоки од реалните но ќе предизвика и несигурност во квалитетот на производите,“
појасни Георгиевски.
Георгиевски додаде дека наместо замрзнување на цените на производите, треба да се размислува во насока на „замрзување“ на разликата помеѓу набавната и продажната цена на стоките, а истакна и дека е потребно стабилизирање на енергентите во рамка во која државата би гарантирала одредени цени на електричната енергија и на гасот, од кои значително зависи висината на цената на производите.
За долгорочно стабилизирање на пазарот на храна, пак, треба да се имплементираат и долгорочни мерки како што е формирање една надлежна државна институција бидејќи, како што вели Огнен Оровчанец од Агро-бизнис комората, во моментов надлежностите се поделени меѓу Министерството за земјоделство, шумарство и водостопанство, Министерството за економија, Агенцијата за храна и ветеринарство и Министерството за здравство, што покажува дека овие институции функционираат без меѓусебна координација, а никој не сноси последици за пропустите.
„Одговорноста едноставно се префрла од еден на друг, без при тоа да се најде решение за проблемите кои постојат. Затоа сметаме дека е неопходно да постои едно министерство за храна, кое ќе биде целосно надлежно за сите прашања поврзани со оваа проблематика. Така ќе имаме системски и инклузивен пристап во регулирање на оваа значајна област, кој на граѓаните ќе им гарантира пристап до квалитетни прехранбени производи по реални цени. Ова барање Сојузот и Агро-бизнис комората досега неколку пати го имаат јавно истакнато, но веруваме дека состојбата во која се најдовме поради кризата уште еднаш ја апострофира неговата важност“,
рече директорот на Агро-бизнис комората, Огнен Оровчанец.