Предлог-законот, како што денеска изјави министерот за јавна администрација Горан Минчев, е подготвен од група уставни експерти. Правичната застапеност ќе се регулира со подзаконски акти откако ќе се добие мислењето од Венецијанската комисија
Законот за правична застапеност денеска ќе биде разгледан на владина седница по што ќе биде испратен до Венецијанската комисија, а дури потоа ќе влезе во собраниска процедура.
Предлог-законот, како што денеска изјави министерот за јавна администрација Горан Минчев, е подготвен од група уставни експерти. Правичната застапеност ќе се регулира со подзаконски акти откако ќе се добие мислењето од Венецијанската комисија.
„Овој закон за правична застапеност којшто морам да кажам дека е уставна категорија која произлегува од Охридскиот рамковен договор, го подготви група на експерти во Владата. Законот денеска ќе се разгледа на владина седница и понатаму ќе биде проследен во Венецијанската комисија да евентуално добиеме забелешки, сугестии или мислења од нивна страна“,
рече Минчев во одговор на новинарско прашање.
Според него, она што е важно за овој закон е дека вработувањата ќе бидат врз база на компетентност, квалитет и професионалност, тоа што и е потребно на јавната администрација.
„Ако зборуваме за модерна јавна администрација, тоа се првите предуслови кои мора да се согледаат и применат. По забелешките од Венецијанската комисија ќе биде пратен до Собранието“,
додаде Минчев.
Прашан како ќе се мери правичната застапеност во вработувањата, Минчев вели дека „баланерсот“ е укинат од страна на Уставниот суд и затоа мотивот бил овој закон да го прават група на уставни експерти.
„Овој закон го прават група на уставни експерти за да не се соочиме повторно со евентуално укинување на некои членови или одредби од постоечкиот закон. Моделот за правична застапеност ќе биде донесен со подзаконски акти, но по претходни евентуални забелешки од Венецијанската комисија“,
рече тој.
За тоа кога ќе почне да се практикува и колку време и е потребно на Венецијанската комисија, Минчев рече дека не би можел да даде коментар.