Министерството за политички систем не треба да има член во Советот за Охридскиот регион, а одлуките, ова тело не треба да ги носи според Бадентер, велат од еко-невладината „Фронт 21/42“.
Тие беа вклучени во подготовката на предлог законот за управување со природното и културното наследство во Охридскиот регион, но не беа поканети на седницата на собраниската Комисија за култура која вчера ја отвори дебатата. Велат дека се изиграни со тоа што на предлог-законот му се додавани работи за кои воопшто не станувало збор, како што е вметнувањето нови членови во Советот.
„Целта на новиот закон беше да се деполитизира управувачкото тело а неговата структура да стане стручна. Токму затоа баравме и беа вметнати критериуми за стручност и за експертиза за членовите. Ваков предлог за член од министерството за политички систем никогаш не бил разгледуван од страна на работата група која работеше на законот, ниту пак доставен како коментар во периодот на консултациите. Членот од министерството за политички систем е додаден без знаење на „Фронт 21/42“ и без дискусија ниту со работната група ниту со јавноста. Министерството за политички систем нема никаква улога ниту надлежност во управување и заштитата на светското природно и културно наследство во Охридскиот регион“,
велат од „Фронт 21/42“.
Тие се изненадени и од предложената законска одредба, Советот одлуките да ги носи според Бадентер.
„Одредбите за носење одлуки со Бадентер се буквално призалепени на веќе постоечки одредби и очигледно е нестручното додавање на истите. Оправданост за ваквите интервенции нема. Целта е одлуките да се носат стручно и независно а членовите на советот да одговараат за секоја донесена одлука и изнесен став. За овие сите овие измени прв пат дознавме по објавување на законот од страна на Собранието“,
посочуваат од невладината.
Иако активно партиципираа во изработката на законското решение со свои идеи, совети и коментари, на нивните претставници им било оневозможено да учествуваат во расправата на собраниската Комисија за култура.
„Веднаш кога дознавме дека е закажана седница на Комисијата за култура каде ќе се разгледува законот, писмено се обративме до Комисијата со барање за присуство и можност за обраќање. Јавноста, транспарентноста и дебатата се особено потребни имајќи предвид дека нацртот кој влезе во собраниска процедура има одредби кои се спротивни на препораките на УНЕСКО и никогаш не биле дискутирани. Верзијата која е испратена во Собрание не е иста со верзијата која Владата ја испрати на мислење до УНЕСКО и ја презентираше во Баку како главно достигнување на „прогресот“ во исполнувањето на препораките. И покрај сето ова Комисијата не дозволи да присуствуваме ниту како јавност ниту како членови на работата група која го учествуваше во подготовка на нацрт законот“,
појаснуваат тие.
Заедно со „Фронт 21/42“ во подготовката на предлог-законот учествуваа и нивните колеги од „Охрид СОС“, кои на социјалните мрежи изразија резигнација поради тоа што не биле поканети на расправата на комисијата.